بھٹکل،22؍اکتوبر(ایس او نیوز) بھٹکل تعلقہ کے کائکینی گرام پنچایت دفتر کا تالا توڑ کر اندر گھسنے والے چوروں نےتقریباً ڈیڑ ھ ہزار روپے اور کمپیوٹر کی ہارڈ ڈسک پر ہاتھ صاف کردیا ہے۔
معلوم ہوا ہے کہ منگل کی شب میں دو بجے کے وقت چوری کی یہ واردات انجام دی گئی ہے۔ چوروں نے دفتر کے اندر موجود الماری کھول کر اس میں موجود کاغذات بھی باہر بکھیر دئے تھے جو پنچایت عملے کی ٹیبل کے خانے میں رکھے ہوئے تھےٹیکس کے زمرے میں وصول شدہ رقم 1474 روپوں پر ہاتھ صاف کرنے کے بعد سیکریٹری کے کمرے میں رکھے ہوئے کمپیوٹر کی ہارڈ ڈسک بھی نکال کرچور اپنے ساتھ لے گئے ہیں۔دفتر میں عملے سے متعلق جتنے ٹیبل تھے ان کے خانوں میں بھی رقم ڈھونڈنے کی کوشش کی گئی ہے۔ اس کے علاوہ گرام پنچایت دفتر کے سامنے موجود ولیج اکاؤنٹنٹ کے دفتر کا تالابھی توڑ کر اندر گھسنے کی کوشش کی گئی ہے۔
چور ی کی اس واردات کا پورا منظر گرام پنچایت دفتر میں موجود سی سی ٹی وی کیمرے میں قید ہوگیا ہے۔اس سلسلے میں پی ڈی او چندر کانت گاؤنکر نے مرڈیشورپولیس اسٹیشن میں شکایت درج کروائی ہے۔معاملہ درج کرلینے کے بعد پولیس نے تحقیقات شروع کردی ہے۔