بھٹکل میں 8 جون سے منادر اور 9 جون سے کھلیں گی مساجد
بھٹکل 7/جون (ایس او نیوز) مرکزی حکومت سے اجازت ملنے کے بعد ریاستی حکومت نے کل 8 ؍ جون سے تمام عبادت گاہوں کو عوام کیلئے کھولنے کا فیصلہ لیا ہے۔ حکومت کے اس اعلان کے بعد بھٹکل میں کل تمام منادر عوام کے لئے کھلیں گی، البتہ سوڈی گیدے مندر کو فی الحال عوام کے لئے نہ کھولنے کا فیصلہ کیا گیا ہے کیونکہ اُس مندر میں زیارت کرنے کے لئے زیادہ تر لوگ پڑوسی ضلع اُڈپی سے آتے ہیں۔ بھٹکل کا معروف مرڈیشور مندر جو کل سے اوپن ہورہا ہے، انتظامیہ نے سینی ٹائزر مشین کو باہر نصب کردیا ہے، اسی طرح تھرمل اسکیانر کو بھی باہر لگادیا گیا ہے۔بتایا گیا ہے کہ جن کو بھی مندر کے درشن کرنے ہوں گے، ان کی پہلے تھرمل اسکیننگ کی جائے گی۔
مساجد 9 جون سے کھولنے کا فیصلہ: اس دوران قومی سماجی ادارہ مجلس اصلاح و تنظیم کی طرف سے جنرل سکریٹری عبدالرقیب ایم جے ندوی نے خبردی ہے کہ احتیاطی طور پر بھٹکل کی تمام مساجد کو عوام کے لئے 9 جون سے کھولنے کا فیصلہ لیا گیا ہے۔ انہوں نے بتایا کہ آج سنیچر کو بھٹکل کے دونوں قاضی صاحبان سمیت علماء و دیگر ذمہ داران کے ساتھ میٹنگ کے انعقاد کے بعد اس بات کا فیصلہ کیا گیا ہے کہ بھٹکل کی تمام مساجد کو 9 جون سے کھولا جائے۔ اس موقع پر نماز میں شریک ہونے والوں کے لئے چند رہنما اُصول بھی جاری کئے گئے ہیں جس میں کہا گیا ہے کہ لوگ اپنے گھروں سے ہی وضو کرکے اور اپنے ساتھ مُصلٰی بھی ساتھ لے کر مسجد آئیں، اسی طرح عمر رسیدہ لوگوں اور دس سال سے کم عمر کے بچوں کو مساجد میں نہ لانے سمیت بیمار لوگوں کو بھی گھروں میں ہی نماز پڑھنے کی تلقین کی گئی ہے۔
