بھٹکل: چارٹرڈ فلائٹ کے ذریعے آنے والے 71 لوگوں کے لئے گئے تھوک کے سیمپل
بھٹکل 14/جون (ایس او نیوز) دبئی سے چارٹرڈ فلائٹ کے ذریعے کل بھٹکل پہنچنے والے 184 مسافروں میں سے آج 71 لوگوں کے تھوک کے سیمپل لئے گئے ہیں جس میں دس سال سے کم عمر کے 26 بچے بھی شامل ہیں۔
ذرائع سے ملی اطلاع کے مطابق آج اتوار شام کو 21 حاملہ خواتین، ان کی دیکھ ریکھ کرنے والی 18 دیگر خواتین، ان کے 26 بچے (دس سال سے کم عمر والے بچے) اور تین خواتین سمیت 6 عمر رسیدہ (60 سال یا اس سے زائد) لوگوں کے تھوک کے سیمپل لئے گئے ہیں، بتایا گیا ہے کہ سبھی سیمپلس کل پیر صبح کوویڈ.19 کورونا جانچ کے لئے کاروار لیباریٹری روانہ کئے جائیں گے۔ منگل شام تک رپورٹ آنے کی توقع ہے۔
بحرین اور دبئی سے آئے ہوئے لوگوں کو کیا گیا کورنٹائن: ذرائع سے پتہ چلا ہے کہ آج اتوار بحرین سے ایک فیملی اور دبئی سے ایک شخص بنگلور ہوتے ہوئے آج بھٹکل پہنچے ہیں، خبر ملی ہے کہ یہ لوگ سیدھے اپنے گھر چلے گئے تھے مگر ضلعی حکام کو خبر ملتے ہی انہیں کورونا کی جانچ کے لئے تھوک کے سیمپل حاصل کرنے کے بعد پرائیویٹ ہوٹل میں کورنٹائن کیا گیا ہے۔ بتایا گیا ہے کہ بحرین سے جو فیملی آئی ہے اس میں چار بچے بھی شامل ہیں۔جنہیں اب کورنٹائن کیا گیا ہے۔