بھٹکل:ٹاؤن میونسپل کاؤنسل کی طرف سے مسجد وں میں کیا گیا جراثیم کُش دوائیوں کا چھڑکاؤ؛ پنچایت حدود کے علاقوں میں بھی چھڑکائی گئی دوائیں
بھٹکل 5/اپریل (ایس او نیوز)کورونا وائرس کو پھیلنے سے روکنے کے لئے ضلع انتظامیہ کے حکم سے ایک طرف بھٹکل ٹاؤن میونسپل کاؤنسل کی جانب سے مسجدوں میں جراثیم کُش دواؤں کا چھڑکاؤ (اسٹریلائزیشن) کیا گیا تو وہیں مختلف پنچایت کی طرف سے مختلف علاقوں کے مکانوں میں بھی دوائیوں کا چھڑکاو کیا گیا۔ اسی طرح گذشتہ روز بھٹکل سرکاری اسپتال میں بھی دواوں کا چھڑکاو کیا گیا۔
لاک ڈاؤن کی وجہ سے لوگ اپنے اپنے گھروں میں بند ہیں۔ اب بلدیہ اور پنچایتوں کی طرف سے جہاں شہر کی سڑکوں اور عوامی مقامات پر جراثیم کش دواؤں کا چھڑکاؤ اور صفائی مہم چلائی جارہی ہے، وہیں پرسرکاری عملے کی طرف سے تعلقہ کی 7مختلف مساجد میں سنیچر کے دن دواؤں کا چھڑکاؤ کیا ہے ۔ بتایا گیا ہے کہ اگلے ایک دو دن میں مزید مساجد میں بھی یہ کام انجام دیا جائے گا۔
مسجدوں کے بیرونی احاطے، اندرونی ہال اور دروازوں کا اسٹریلائزیشن کی کارروائی انجام دی گئی۔ٹی ایم سی کے چیف آفیسر نے بتایا کہ تمام مساجد کے ذمہ داروں سے اجازت لے کر ٹی ایم سی عملے نے یہ کارروائی بحسن وخوبی انجام دی ہے۔
یاد رہے کہ بھٹکل کے جن لوگوں کی کورونا پوزیٹیو رپورٹ موصول ہوئی تھی، اُن کے مکانوں میں بھی جراثیم کش دواوں کا اُن ہی دنوں میں چھڑکاو کیا گیا تھا، اسی طرح گذشتہ روز بھٹکل کے سماجی کارکن جناب نثار احمد ٹاپ کے مکان پر بھی جراثیم کش دواوں کا چھڑکاو کیا گیا، جو تنظیم کی قیادت میں اپنا پورا وقت سرکاری اسپتال میں دے رہے ہیں اور کورونا مریضوں کو تنظیم کی جانب سے ہرممکن تعاون فراہم کرنے میں لگے ہوئے ہیں۔
خیال رہے کہ بھٹکل کے جملہ آٹھ افراد کو کورونا پوزیٹیو کی علامات پائی جانی کی وجہ سے انہیں کاروار پتنجلی اسپتال میں کورنٹائن کیا گیا ہے، جبکہ ایک فرد کو جو دبئی سے مینگلور ائرپورٹ پر اُترا تھا، اُسے مینگلور وینلاک اسپتال میں داخل کیا گیا ہے۔ بتایا گیا ہے کہ کورنٹائن میں جن لوگوں کو رکھا گیا ہے اُن تماموں کی صحت بالکل ٹھیک ہیں۔
