منگلورو میں 445کروڑ روپے کی لاگت سے تعمیر ہوگا جدید ترین سہولتوں والا ’پبلک ٹرانسپورٹ سینٹر‘
منگلورو15/مئی(ایس او نیوز) منگلورو کے پمپ ویل سرکل کے پاس 445کروڑ روپے کی لاگت سے ایک جدید ترین بس اسٹانڈ اور شاپنگ کامپلیکس کی تعمیر کے لئے ریاستی کابینہ نے منظوری دی ہے۔
قانون اور پارلیمانی امور کے وزیر جے سی مادھو سوامی کے مطابق یہ منصوبہ پبلک پرائیویٹ پارٹنرشپ (پی پی پی) کی بنیاد پر پورا کیا جائے گا۔ اس کامپلیکس میں جدید ترین سہولتوں والا بس اسٹانڈ، شاپنگ کامپلیکس اور کثیر منزلہ پارکنگ لاٹ ہونگے۔اس کے لئے ریاستی حکومت کی طرف سے کوئی فنڈ فراہم نہیں کیاجائے گا۔پرائیویٹ پارٹنر اس کی تعمیر کرکے حکومت کے حوالے کرنے والے ہیں۔
اس کے علاوہ ریاستی کابینہ نے جو اہم فیصلے کیے ہیں اس میں اساتذہ کے تبادلے،سی اورڈی گریڈ کے ملازمین کی بھرتی اور پری میٹرک اور پوسٹ میٹرک ہاسٹلوں کے طلبہ کے لئے ضروری فنڈ کی منظوری وغیرہ شامل ہیں۔ معلوم ہوا ہے کہ جن اساتذہ کی عمر 50سال سے زائد ہے ان کا تبادلہ زونل سطح پر کیاجائے گا۔اس کے علاوہ لیڈیز ٹیچرز کے تبادلے کے قوانین میں کچھ نرمی اور رعایت دینے کا فیصلہ کیا گیا ہے۔
محکمہ پنچایت راج کے تحت سی اور ڈی گریڈ ملازمین کے تقرر کے سلسلے میں نئے قوانین وضوابط بنانے کا فیصلہ کیا گیا۔اس کے علاوہ پسماندہ طبقات کے لئے مخصوص پری میٹرک اور پوسٹ میٹرک طلبہ کے ہاسٹلوں اور ریسیڈنشیل اسکولوں میں طلبہ کوکھانا، یونیفارم اور دوسری اشیائے ضروریہ کی فراہمی کے لئے 260 کروڑ روپے کا فنڈ منظور کیا گیا۔
