ملک میں یکساں سیول کوڈ نفاذ کی کانگریس مخالفت کرے گی، بلدیاتی انتخابات کروانے حکومت تیار: وزیر اعلیٰ سدارامیا
بینگلورو،13/اگست (ایس او نیوز) کرناٹک کے وزیر اعلیٰ سدارامیا نے میسورو میں میڈیا کے نمائندوں سے ملاقات کے دوران کہا ہے کہ مرکز کی بی جے پی حکومت کے ذریعہ نافذ کئے جانے والے یکساں سیول کوڈ کی کانگریس مخالفت کرے گی۔
اس ملک میں یکساں سیول کوڈ کا نفاذ ممکن نہیں ہے۔ اس ملک میں کیرالہ حکومت نے بھی اسمبلی میں قرار داد منظور کر کے یکساں سیول کوڈ کی مخالفت میں فیصلہ لیا ہے۔ کرناٹک کی ہماری حکومت بھی اس کی مخالفت کررہی ہے۔ آنے والے دنوں میں اس تعلق سے ہم اہم فیصلہ لینے کا اعلان بھی کرنے والے ہیں۔
تمل ناڈو سے کاویری ندی کے پانی کیلئے ڈالے جارہے دباؤ کے تعلق سے وزیر اعلیٰ سدارامیا نے کہا کہ فی الحال ریاست ابھی کاویری سے تمل ناڈو کو پانی بہانے کی حالات میں نہیں ہے۔ بارش کم ہو نے سے ریاست میں ہی اب پینے کے پانی کی قلت کا مسئلہ پیدا ہورہاہے۔ ہمیں پہلے اپنی ریاست کا کاشتکاروں کی فصلوں کو بچانے اور عورام کو پینے کے پانی کی فراہمی پر توجہ دینی ہے۔ ریاست کے حالات کو سامنے رکھ کر جلد از جلد ہی تمل ناڈو حکومت کے ذمہ داروں سے حکومت کرناٹک بات کرنے والی ہے۔
بورڈ کارپوریشنوں کے تعلق سے کئے گئے سوالوں کا جواب دیتے ہوئے وزیر اعلیٰ سدارامیا نے کہا کہ وارڈ ڈی کمیٹیشن کے تعلق سے عدالت نے چند ایک مشورے دئے ہیں اور ہمیں وقت دیا ہے کہ اس ضمن میں جلد از جلد رپورٹ عدالت کو پیش کریں۔ بلدیاتی کے انتخابات کروانے کیلئے حکومت تیار ہے۔ سابقہ بی جے پی حکومت نے بی بی ایم پی سمیت دیگر کئی انتخابات روک دئے تھے۔ ہم کوئی ایسا کام نہیں کریں گے۔ عدالت کے حکم کی تعمیل کرتے ہوئے جلد از جلد انتخابات کروائے جائیں گے۔
اپنے جنم دن کی تاریخ کے تنازعہ کے تعلق سے انہوں نے واضح کیا کہ 3/اگست اور 12/اگست کو جنم دن کہنا غلط ہے۔ جب میرا اسکول میں داخلہ ہوا تھا تو استاد نے الگ الگ تاریخ درج کی تھی۔ دوسری تاریخ میرے والد نے درج کروائی تھی۔ اس لئے یہ دونوں تاریخیں غلط ہیں۔ میرے جنم دن کی اصل تاریخ کا خود مجھے پتہ نہیں ہے۔ اس لئے مجھے اپنا جنم دن منا نے میں کوئی خاص دلچسپی نہیں ہے۔
بی بی کے دفتر پر رونما آگ حادثہ کے تعلق سے انہوں نے کہا کہ تمام زخمی افراد کی صحت کے بارے میں تفصیلی معلومات حاصل کی ہیں۔ یہ افراد 40 فیصد سے کم ہی جھلسے ہیں۔ ان تمام کو بہتر سے بہتر علاج کی سہولت فراہم کرنے کی ہدایت دی گئی ہے۔ ان کی یہ دعا ہے کہ یہ لوگ جلد از جلد صحت یاب ہوجائیں۔