بھٹکل مخدوم کالونی میں تیز رفتار کار کی اسکوٹر سے ٹکر؛ عمر رسیدہ شخص جاں بحق
بھٹکل 18/مارچ (ایس او نیوز) مخدوم کالونی کے قریب بندر روڈ پر ایک تیز رفتار کار کی اسکوٹر سے ہوئی ٹکر میں اسکوٹر سوار جاں بحق ہوگیا جس کی شناخت محمد عمر کنڈنگوڑا (76) کی حیثیت سے کی گئی ہے۔ حادثہ اتوار رات قریب 10:30بجے پیش آیا۔
بتایا گیا ہے کہ عمر رسیدہ شخص محمد عمر ڈونگرپلی کےاے پی جے عبدالکلام روڈ پر واقع اپنے قریبی رشتہ دار کی تیمارداری کرنے کے بعد واپس اپنے گھر مخدوم کالونی جارہے تھے کہ بندر روڈ پر ایک تیز رفتار کار جو بندر کی طرف جارہی تھی، اس کی اسکوٹر سے ٹکراگئی۔ ٹکر اتنی شدید تھی کہ جناب عمر صاحب اسکوٹر سے اُچھل کر سڑک پر جاگرے جس کے نتیجے میں ان کے سر کو گہری چوٹ لگی۔ انہیں فوری طور پر قریبی پرائیویٹ اسپتال لے جایا گیا، جہاں ابتدائی طبی امداد کے بعد مینگلور منتقل کیا گیا، مگر وہ جانبر نہ ہوسکے اور اسپتال میں داخل ہونے کے بعد رات قریب دو بجے زخموں کی تاب نہ لاکر چل بسے۔ انا للہ و انا الیہ راجعون
حادثے کے فوری بعد جائے وقوع پر سینکڑوں لوگ جمع ہوگئے اور کار ڈرائیونگ کرنے والے نوجوان پر لاپرواہی سے کار چلانے کا الزام عائد کرتے ہوئے سخت ناراضگی کا اظہار کیا۔ اطلاع ملتے ہی پولس بھی موقع پر پہنچ گئی اور کارسمیت ڈرائیور کو اپنی تحویل میں لیتے ہوئے حالات کو سنبھال لیا۔
مینگلور اسپتال میں ہی پوسٹ مارٹم کے بعد میت کو اب بھٹکل لایا جارہا ہے۔
بھٹکل ٹاون پولس تھانہ میں معاملہ درج کیا گیا ہے اورمزید چھان بین جاری ہے۔
