بھٹکل کے ہونّے گدّے میں سمندری کٹاؤ؛ عوام میں خوف وہراس
بھٹکل17؍جولائی (ایس او نیوز)بھٹکل اور اطراف میں گزشتہ ڈیڑھ مہینے سے برس رہی مسلسل بارش کی وجہ سے سمندری لہروں کے اچھال میں بہت زیادہ تیزی آگئی ہے اورخاص طور پر ہیبلے گرام کے ہونّے گدّے علاقے میں سمندری کٹاؤ بڑھ رہا ہے۔ اس کی وجہ سے ساحلی کنارے پر رہنے والے لوگ بہت ہی زیادہ خوف زدہ اور پریشان ہوگئے ہیں۔
اس علاقے میں ہرسال برسات کے موسم میں سمندری کٹاؤ کی صورت میں اس طرح کا مسئلہ کھڑاہوجاتا ہے۔مگر مقامی لوگوں کا کہنا ہے کہ اس بار اس کی شدت کچھ زیادہ ہی ہوگئی ہے۔ گزشتہ سال سرکاری محکمہ کی جانب سے لاکھوں روپے خرچ کرکے سمندری لہروں کو روکنے کے لئے دیوار تعمیر کی گئی تھی، لیکن کچھ مقامات پر سمندر کی لہریں اس دیوار سے بھی اونچی اٹھ رہی ہیں اور رہائشی علاقے میں داخل ہورہی ہیں۔لہروں کا بہاؤ اور اس کی تیزی ایسی ہے کہ سمندری کنارے کے پاس بنی سڑک بھی یہاں وہاں سے ٹوٹ پھوٹ کر رہ گئی ہے۔ اور ا س کا بیشتر حصہ سمندر میں بہہ گیا ہے۔
مقامی عوام کا کہنا ہے کہ سمندری لہروں کو روکنے والی دیوار کو مزید مضبوط اور مستحکم بنایاجائے اور یہاں کے باشندوں کے تحفظ کے لئے مناسب اقدامات کیے جائیں۔ بھٹکل تحصیلدار وی این باڈکر نے متاثرہ علاقے کا دورہ کرکے حالات کا جائزہ لینے کے بعد اخبار نویسوں کو بتایا کہ انہوں نے متعلقہ محکمہ اور افسران کو صورتحال کی پوری رپورٹ بھیج دی ہے۔آئندہ دنوں میں یہاں سمندری کٹاؤ روکنے کے لئے ضروری اقدامات کیے جائیں گے۔
