مینگلورو،29 / اپریل (ایس او نیوز) اسمبلی الیکشن کے پس منظر میں ووٹروں کو لبھانے کے لئے اس سے قبل چار قسم کی گارنٹی جاری کرنے والی کانگریس کی طرف سے راہل گاندھی نے منگلورو کے ایک اجلاس میں پانچویں گیارنٹی کا اعلان کرتے ہوئے کہا کہ اگر کانگریس پارٹی کی حکومت بنے گی تو ریاست میں خواتین کے لئے سرکاری بسوں میں مفت سفر کرنے کی سہولت دی جائے گی۔
    
شہر کے مضافات اڈیار میں واقع کھلے میدان میں کانگریس پارٹی کی طرف سے منعقدہ جلسہ سے خطاب کرتے ہوئے راہل گاندھی نے کہا کہ بی جے پی حکومت نے 40 فیصد کمیشن کے ذریعے اس ریاست کی خواتین کا پیسہ چھین لیا ہے ۔ ہم وہ پیسے خواتین کو سرکاری بسوں میں مفت سفر کرنے کی سہولت دیتے ہوئے واپس لوٹائیں گے ۔ راہل نے کہا کہ جب کانگریس پارٹی برسراقتدار آئے گی تو پہلے کابینی اجلاس میں ہی پانچوں گی کہارنٹی پوری کرنے کے لئے اقدامات کیے جائیں گے ۔ 
    
انہوں نے کہا کہ ملک کے 40 کروڑ عوام خط غربت سے نیچے جی رہے ہیں ۔ وزیر اعظم کا مضحکہ اڑاتے ہوئے راہل نے کہا کہ مودی نے عوام سے کیے گئے اپنے وعدے پورے نہیں کیے ، لیکن آدانی سے کیے گئے تمام وعدے پورے کیے ہیں ۔ 
    
اس موقع پر سابق وزیر اعلیٰ ایم ویرپّا موئیلی نے کہا کہ ساحلی علاقے کی بھائی چارگی کو تباہ کرنے والی بی جے پی کو شکست دینے کے لئے اور یہاں پر موجود بدعنوانی کا خاتمہ کرنے کے لئے کانگریس کی حمایت کی جائے ۔  
    
کے پی سی سی کے صدر ڈی کے شیو کمار نے خطاب کرتے ہوئے کہا کہ بی جے پی نے اپنی حمایت کرنے والوں کو فائدہ نہیں پہنچایا ہے ۔ کسانوں کے جیون میں کوئی بدلاو نہیں آیا ہے ۔ کئی لیڈروں نے بی جے پی کا ساتھ چھوڑ کر کانگریس میں شمولیت اختیار کی ہے ۔ ساحلی علاقے میں تجارت اور صنعت بڑھ نہیں رہی ہے ۔ روزگار نہیں مل رہا ہے ۔ اگر کانگریس پارٹی کی حکومت بنے گی تو ہر ضلع کے لئے بجٹ میں منصوبے رکھے جائیں گے ۔ کانگریس جو گارنٹی دی ہے اسے پورا کرنے کا میں یقین دلاتا ہوں ۔ اگر کیے گئے وعدے پورے نہیں کیے تو پھر آئندہ ووٹ کی اپیل نہیں کروں گا ۔ 
    
منگلورو کےد ورے پر آئے ہوئے راہل گاندھی نے یادوں کے البم کو کھنگالتے ہوئے کہا کہ مجھے یاد ہے کہ سابق وزیر اعظم اندرا گاندھی نے منگلورو ہوائی اڈہ ، بندر گاہ اور ایم سی ایف جیسے کارخانے قائم کرنے اور انہیں ترقی دینے کے اقدامات کیے تھے ۔ یہاں کے بینکوں کا نیشنلائزیشن کیا تھا ۔ اب انہیں بینکوں کو مودی حکومت نے دوسرے بینکوں میں ضم کرنے کے نام پر مٹا کر رکھ دیا ہے ۔ ہوائی اڈے کو آدانی کے حوالے کرکے یہاں کے عوام کو دھوکا دیا ہے۔