بھٹکل کی خواتین کو ہنرمند بنانے رابطہ سوسائٹی کی طرف سے2/مارچ سے شروع ہورہا ہے سہ ماہی ٹیلرنگ ورکشاپ؛ فائدہ اُٹھانے کے لئے خواتین فوری رجوع ہوں
بھٹکل 26/فروری (ایس او نیوز) بھٹکل کی زیادہ تر خواتین اعلیٰ تعلیم یافتہ ہیں، ایسے میں اگر وہ ہنرمند بھی بن جائیں تو سماج میں معاشی تبدیلی لاسکتی ہیں اور گھر بیٹھے پورے خاندان کے لئے روزگار حاصل کرسکتی ہیں، اسی مقصد کے تحت رابطہ سوسائٹی کی جانب سے عنقریب سلائی کڑھائی کاسہ ماہی تربیتی ورکشاپ شروع کیا جارہا ہے۔ اس بات کی اطلاع رابطہ سوسائٹی کے جنرل سکریٹری جناب عتیق الرحمن منیری نے دی۔
انہوں نے بتایا کہ ہنرمند انسان کبھی روزگار کے لئے پریشان نہیں ہوتے اورباعزت طریقے سے حلال کی کمائی حاصل کرتے ہیں۔ آگے بتایا کہ قوموں کی ترقی میں تعلیم اور ہنرسے بڑھ کر کوئی شے اہم نہیں۔ اسی کو مدنظر رکھتے ہوئےرابطہ کا یہ ٹیلرنگ ورکشاپ رکھا گیا ہے جس کے لئے خاتون ٹیلرماسٹر کی خدمات بھی حاصل کی گئی ہے۔
سلائی کڑھائی تربیتی ورکشاپ کے تعلق سے کنوینرشپ کی تمام ذمہ داری مسقط کے بزنس مین اور سماجی کارکن جناب سلیم سعدا کوسونپی گئی ہے جو پوری تیاری کے ساتھ اس ورکشاپ کا انعقاد کررہے ہیں۔ جناب سلیم سعدا نے بتایا کہ ٹیلرنگ کا تربیتی کورس تین ماہ کا ہوگا او ر اس کا آغاز 2 مارچ سے کیا جارہا ہے۔ ابتدا میں صبح 10:30 بجے سے 12:30 بجے تک دو گھنٹے کا کلاس ہوگا۔ رمضان میں بھی یہی وقت ہوگا، رمضان کے بعد صبح اور شام دو کلاسس کرنےکا منصوبہ ہے۔
فی الحال پندرہ سے زائد خواتین نے اپنا نام درج کرایا ہے، اور اگلے چند دنوں میں تعداد دوگنی سے بھی زیادہ ہو نے کی توقع ہے۔ جناب سعدا سلیم نے بتایا کہ ٹیلرنگ کورس میں شریک ہونے کے لئے اگر خواتین کی تعداد بڑھتی ہے تو مزید ٹیلر ماسٹر کی خدمات بھی حاصل کی جاسکتی ہے۔ انہوں نے بتایا کہ چونکہ طالبات ایس ایس ایل سی اور پی یو سی کے امتحانات کی تیاریوں میں مصروف ہیں، اس لئے دلچسپی رکھنی والی طالبات اپنے امتحانات کے بعد کلاس جوائن کرسکتی ہیں۔ جن کے لئے سکینڈ بیچ شروع کیا جاسکتا ہے۔
سلائی کڑھائی کے اس ورکشاپ میں شریک ہونے کے لئے دلچسپی رکھنی والی خواتین سے درخواست کی گئی ہے کہ وہ پہلی فرصت میں رابطہ سوسائٹی (نوائط کالونی، بھٹکل) دفتر پہنچ کر اپنے نام درج کرائیں اور ضروری تفصیلات حاصل کریں۔ مزید معلومات کے لئے رابطہ آفس کے نمبر 7349642746 پر کال کرسکتے ہیں۔