پُتور22/جنوری (ایس او نیوز) ماروتی اومنی اور پیک آپ کے درمیان ہوئی خطرناک ٹکر کے نتیجے میں اومنی پر سوار ایک شخص کی موت واقع ہوگئی، جبکہ دوسرا شدید زخمی ہوگیا، حادثے میں پیک آپ کار ڈرائیور کو بھی چوٹیں آئی ہیں ۔ حادثہ منگل صبح مُکوے مسجد کے سامنے پیش آیا۔
مرنے والے کی شناخت کرشنا بھٹ کی حیثیت سے کی گئی ہے جو اومنی پر سوار اپنے بیٹے اویناش بھٹ کے ساتھ ویرمنگلا سے پُتور جارہے تھے۔حادثے میں اویناش کو بھی شدید چوٹ آئی ہے اور اُسے مینگلور اسپتال منتقل کیا گیا ہے۔
حادثہ کے پوری واردات مسجد کے باہر لگے سی سی ٹی وی کیمرے میں قید ہوگئی، جس میں دیکھا گیا کہ پیک آپ سامنے والی ایک بائک کو اوورٹیک کرنے کے چکر میں بے قابو ہوکر سامنے سے آرہی ماروتی اومنی سے بہت بری طرح ٹکراگئی ۔ ٹکر اتنی شدید تھی کہ پیک آپ کار کے ساتھ ساتھ ماروتی اومنی بھی سڑک کے باہر جاگری۔ حادثے میں کرشنا بھٹ اور اویناش بھٹ کو شدید زخمی ہونے کی بنا پر مقامی اسپتال میں ابتدائی طبی امداد کے بعد مینگلور لے جایا جارہا تھا، مگر مینگلور اسپتال پہنچنے سے پہلے ہی کرشنا بھٹ نے دم توڑ دیا۔
حادثہ میں پیک آپ کے ڈرائیور کو بھی چوٹ لگی ہے اور اُسے پُتور اسپتال میں داخل کیا گیا ہے۔
پُتور پولس تھانہ میں معاملہ درج کیا گیا ہے اور پولس چھان بین کررہی ہے۔