کاسرگوڈ میں جانور لے جانے کے الزام میں دو لوگوں پر حملہ؛ بجرنگ دل کارکنوں کے خلاف معاملات درج کرنے پر مینگلور کے قریب وٹلا اور بنٹوال میں بسوں پر پتھراو
منگلورو:26؍جون (ایس او نیوز) پڑوسی ریاست کیرالہ کے کاسرگوڈ میں جانور لے جانے کے الزام میں دو لوگوں پر حملہ اور لوٹ مار کی وارداتوں کے بعد پولس نے جب بجرنگ دل کارکنوں کے خلاف معاملات درج کئے تو مینگلور کے قریب وٹلا اور بنٹوال میں بسوں پر پتھراو اور توڑ پھوڑ کی واردات پیش آئی ہے۔ پتھراو میں نو بسوں کو نقصان پہنچا ہے۔ شبہ ظاہر کیا گیا ہے کہ بجرنگ دل کارکنوں کے خلاف معاملات درج کرنے پر وٹلا اور بنٹوال میں بھی بجرنگ دل کارکنوں نے ہی پتھراو کی وارداتیں انجام دی ہیں۔
اطلاع کے مطابق پیر کو کاسرگوڈ میں جانوروں کو لے جانے کا الزام عائد کرتے ہوئے بجرنگ دل کے غنڈوں نے ایک سواری کو روک کر اس پر سوار دو لوگوں کی بری طرح پیٹائی کی تھی اور سواری پر موجود جانوروں سمیت پچاس ہزار روپئے کی خطیر رقم لے کر فرار ہوگئے تھے۔ زخمیوں کو فوری طور پر قریبی اسپتال میں داخل کیا گیا تھا جہاں ان کا علاج جاری ہے، زخمیوں کی شناخت پتور کے رہنے والے حمزہ اور الطاف کی حیثیت سے کی گئی ہے۔
بتایا گیا ہے کہ یہ دونوں پتور سے ایک پیک آپ وین پر تین جانوروں کو لاد کر کاسرگوڈ جارہے تھے جس کے دوران ان پر حملہ کیا گیا۔ اطلاع کے مطابق تینوں جانور پتور کے رہنے والے اسماعیل کے تھے جنہوں نے پچاس ہزار روپئے سمیت جانوروں کو کاسرگوڈ کے رہنے والے حارث کو پہنچانے کے لئے دونوں کو روانہ کیا تھا۔
ابھی یہ لوگ حارث کے گھر پہنچنے ہی والے تھے کہ اچانک ایک کار پر سوار سات لوگوں نے ان کی پیک آپ وین کو روک لیا اور کار پر سوار حمزہ اور الطاف کی بری طرح پیٹائی کرتے ہوئے جانور سمیت رقم بھی لے کر فرار ہوگئے۔
واقعے پر کاروائی کرتے ہوئے پولس نے سات بجرنگ دل کارکنوں کے خلاف معاملات درج کئے ہیں ۔غالبا واقعے کی اطلاع ملتے ہی آج منگل کو بنٹوال پولس تھانہ حدود کے کدرے بیٹو اور پانے منگلورو میں بائک سواروں کی ٹولیوں نے سرکاری بسوں پر پتھراؤ اور توڑ پھوڑ کیا۔ بعد میں ایک دوسرے گروہ کی جانب سے وٹلا پولس تھانہ حدود کے سوریکمیرو دیہات میں بھی پتھراؤ کئے جانے کی اطلاعات موصول ہوئی ۔
پولس ذرائع کے مطابق بسوں میں پتھراو اور توڑپھوڑ میں بس ڈرائیور سمیت چند مسافر بھی زخمی ہوئے ہیں جنہیں نزدیکی اسپتالوں میں لے جایا گیا ہے۔
کاسرگوڈ کے پیرلا میں گائے سپلائی کرنے کے دوران حملہ کرنے اور جانوروں سمیت رقم لوٹ کر فرار ہونے کے تعلق سے پیر کو بدی اڑکا پولس تھانے میں بجرنگ دل کارکنوں اکشئے راجپوت سمیت 6افراد کے خلاف کیس درج کیا گیا ہے جس میں سے دو کا تعلق وٹلا سے ہے۔
اُدھر کیرلا پولس نے سواریوں کو ضبط کرتے ہوئے راجپوت اور دیگر دو افراد کو چھوڑنے کی بھی اطلاع ملی ہے ۔
دکشن کنڑا ایس پی مسٹر بی ایم لکشمی پرساد نے بتایا کہ حملہ میں شامل 8 افراد کو پولس تلا ش کررہی ہے۔ ایس پی کے مطابق کچھ شرارتی گروہ علاقے میں بدامنی پھیلانے کی کوشش کررہے ہیں، ان کی گرفتاری کے لئے پولس کی الگ الگ ٹیمیں تشکیل دی گئی ہیں۔ انہوں نے عوام سے اپیل کی کہ معاملے کو لے کر سوشیل میڈیا پر پھیلائی جارہی افواہوں پر دھیان نہ دیں۔