بحرین 7/ نومبر (ایس او نیوز/ اظہرالدین آرمار) بھٹکل مسلم جماعت بحرین کا سالانہ گیٹ ٹوگیدر نوائط ملن 2022 انشاء اللہ 10/ نومبر بروزجمعرات کو ہوٹل رمی گرینڈ سیف میں منعقد کیا گیا ہے جس میں بچوں کے ڈراموں سمیت دیگر تفریحی پروگرام بھی پیش کئے جائیں گے۔ اس بات کی اطلاع نوائط ملن کے کنوینرمحمد اسحاق پلّور نے دی۔
انہوں نے بتایا کہ پروگرام رات ٹھیک نو بجے شروع ہوگا، مہمان خصوصی کے طور پر بھٹکل مسلم گلف کونسل کے سکریٹری جنرل عتیق الرحمن مُنیری صاحب شریک ہوں گے، اسی طرح اعزازی مہمان کے طور پر کینرا مسلم خلیج کونسل کے صدر محمد یونس قاضیاء صاحب بھی تشریف فرما ہوں گے۔
نوائط ملن میں بحرین میں زیر تعلیم جماعت کے اراکین کے ہونہار طلبہ و طالبات کی تہنیت کی جائے گی اور ہمت آفزائی کے طورپر اُنہیں انعامات سے نوازا جائے گا۔ محمد اسحاق نے بتایا کہ چونکہ گذشتہ دو سال کوویڈ وباء کی وجہ سے سالانہ گیٹ ٹوگیدر پروگرام نہیں کئے جاسکے تھے، اس بناء پر اس بار اُن تعلیمی سالوں کے ٹاپرس کی بھی اس بار کے ٹاپرس کے ساتھ نوائط ملن میں تہنیت کی جائے گی۔
جماعت کے صدر جناب الطاف مصباح کی صدارت میں منعقدہ نوائط ملن جمعرات شام کو رات کی ضیافت کے ساتھ شروع ہوگا، جس کے بعد اسٹیج پروگرام ہوگا۔ پروگرام کے آخر میں ریفل ڈراء کے ذریعے ممبران میں انعامات تقسیم کئے جائیں گے۔
جماعت کے جنرل سکریٹری مصیب پٹیل سمیت اراکین انتظامیہ نے جماعت کے تمام ممبران سے درخواست کی ہے کہ وقت مقررہ پر پروگرام میں شریک ہوکر نوائط ملن کو کامیاب بنائیں۔