کاروار میں لائف گارڈز پر نشے میں مست بحریہ کے اہلکاروں نے کیا حملہ۔4ملزمین گرفتار
کاروار 23/ستمبر (ایس او نیوز) نشے میں مست بحریہ کے اہلکاروں کو جب ساحل پر سیر وتفریح کرنے کی سلامتی اور تحفظ کو یقینی بنانے کے لئے تعینات لائف گارڈز نے گہرے پانی میں موج مستی کرنے سے منع کیا اور ساحل پر واپس لوٹ آنے کے لئے کہاتو بحریہ والوں نے ساحلی محافظین پر حملہ کردیا۔
بتایاجاتا ہے کہ کاروارٹیگور ساحل پر سابق فوجی ستیہ جیت پوڈولکر بیچ سپروائزر کے علاوہ چندن جوشی اور سریندرا ریڈکر لائف گاڑڈز عملے کے طورپر اپنی ڈیوٹی انجام دے رہے تھے۔ اس دوران ممبئی نیوی سے تعلق رکھنے والے سنیل چودھری، کملیش یادو، کمل کشور اور ستیندرا کشوارسمندری لہروں سے کھیل رہے تھے اور بری طرح نشے میں دھت تھے اور تقریباً ڈیڑھ گھنٹے سے زیادہ پانی میں مستی کررہے تھے۔ ان کو کسی قسم کے نقصان سے بچانے کے لئے لائف گارڈز عملے نے ساحل پر واپس لوٹنے کے لئے کہا تو چاروں نے بات ماننے کے بجائے لائف گارڈز پر ہی حملہ کردیا۔کہتے ہیں کہ کدمبا بحری اڈے پر ممبئی سے ایک نیوی کا جہاز آیا ہوا تھا جس میں گرفتار کیے گئے ملزمین شامل تھے۔ان لوگوں نے پہلے ایک لائف گارڈپر حملہ کیااور پھر جب بیچ سپروائزر نے مداخلت کرتے ہوئے جھگڑا ختم کرنے کی کوشش تو نیوی کے عملے نے اس پر حملہ کردیا جس کی وجہ سے ساحل پر مارپیٹ اور ہنگامہ آرائی شروع ہوگئی اور ہواخوری کے لئے ساحل پر آنے والے عام لوگوں میں تھوڑی دیر کے لئے افراتفری مچ گئی۔
ساحل پر ہنگامے کی اطلاع جب پولیس کو ملی تو اس نے موقع پر پہنچ کر حالات کو قابو میں کیااورمتاثرہ لائف گارڈز کی شکایت پر کارروائی کرتے ہوئے پولیس نے چاروں ملزمین کو گرفتار کرلیا۔ملزمین کی طبی جانچ کروانے کے بعد ان کے خلاف کیس درج کرلیا گیا ہے۔
