بھٹکل 24 ستمبر (ایس او نیوز)  بھٹکل کے رکن اسمبلی اور اُترکنڑا کے ڈسٹرکٹ انچارج منسٹر منکال وئیدیا نے آج اتوار کو بھٹکل انجمن کالج روڈ پر واقع پرانے اے سی دفتر والی عمارت میں اپنے آفس کا شاندار افتتاح کیا، اس موقع پر اخبارنویسوں سے گفتگو کرتے ہوئے انہوں نے بھٹکل کے عوام سے معذرت چاہتے ہوئے بتایا کہ چار ماہ کی تاخیر کے بعد وہ اپنے دفتر کا افتتاح کررہے ہیں۔ منکال نے کہا کہ  مرڈیشور میں ان کے مکان پر وہ عوام کی مدد کے لئے اور عوام الناس کے مسائل حل کرنے کے لئے ہمیشہ سے ہی دستیاب رہے ہیں ، لیکن اب بھٹکل شہر میں نئے دفتر کا افتتاح کرتے ہوئے عوام کے مسائل حل کرنے سہولت فراہم کی گئی ہے۔

منکال نے بتایا کہ بینگلورو میں  اور ہوناور میں ان کے دفتر کا افتتاح ہوچکا ہے، کاروار میں عنقریب اوپن ہوگا۔ آگے بتایا کہ وہ ہفتہ میں ایک دن بھٹکل ایک دن ہوناور  اور ایک دن بینگلورو میں  عوام کے لئے دستیاب رہیں گے، جبکہ ماہ میں ایک مرتبہ کارواردفتر میں  بھی رہیں گے۔ ان کا دفتر ہر روز صبح دس بجے سے شام پانچ بجے تک کھلا رہے گا۔ عوام اپنے مسائل لے کر دفتر پہنچ سکتے ہیں اور دفتر میں موجود اپنے  سکریٹری کے ذریعے  درپیش  مسائل حل کرسکتے ہیں۔آگےبتایا کہ  دفتر میں کام کا باقاعدہ سسٹم بنایا گیا ہے ، آفس سکریٹری کو  ضروری ہدایات دی گئی ہیں ۔ منکال وئیدیا نے عوام سے درخواست کی کہ وہ جو بھی مسائل ہوں، سیدھے ان کے دفتر پہنچ کر دفتر میں موجود سکریٹری سے  رابطہ کرکے اپنے مسائل کو حل کریں، اگر سکریٹری  سے مسئلہ حل نہیں ہورہا ہے تو ہی اُن سے راست رابطہ کریں۔ اس تعلق سے انہوں نے    بھٹکل ، ہوناور، کاروار اور بینگلورو کے نمبرس جاری کئے اور بتایا کہ یہ نمبرس  چوبیسوں گھنٹے  آن رہیں گے۔

شہر کے بیچوں بیچ  دفترکے افتتاح پر خوشی کا اظہار کرتے ہوئے  قومی سماجی ادارہ مجلس اصلاح و تنظیم   بھٹکل کےصدر عنایت اللہ شاہ بندری نے    عوام کے مسائل کی  یکسوئی کے لئے منکال وئیدیا کی خدمات کی ستائش کی انہوں نے کہا کہ  منکال وئیدیا پہلے سے ہی عوام کے مسائل حل کرنے میں   دلچسپی دکھاتے رہے ہیں ، وہ اپنے گھر پر بھی عوام کے لئے ہمیشہ دستیاب رہتے تھے، اب انہوں نے شہر میں ہی دفتر کھولا ہے اس  سے عوام کو بے حد  فائدہ ہوگا۔ تنظیم جنرل سکریٹری عبدالرقیب ایم جے ندوی، ایس ایم سید پرویز،   الطاف کھروری، ایڈوکیٹ عمران لنکا،  قیصر محتشم، پرویز قاسمجی،   قمر سعدا،  عبدالسمیع کولاو دیگر کئی ذمہ داران  اس موقع پر موجود تھے۔