منگلورو، یکم / اپریل (ایس او نیوز) شہر کی ایک لاڈج میں اپنی بیوی اور دو جڑواں بچیوں کے ساتھ اجتماعی خود کشی کرنے والے میسور کے کاروباری شخص دیویندرا کے بارے میں پتہ چلا ہے کہ وہ قرضہ کے بوجھ سے پریشان تھا اور بیوی بچوں کو سیروتفریح کے بہانے منگلورو میں لانے کے بعد انہیں زہریلا کھانا کھلا کر ہلاک کرتے ہوئے خود کو پھانسی کے پھندے سے لٹکایا تھا ۔
    
یاد رہے کہ 30 مارچ کو شہر میں  کے ایس راو روڈ پر واقع ایک لاڈج کے کمرے میں بیک وقت چار لاشیں برآمد ہونے کی سنسنی خیز واردات پیش آئی تھی۔ مہلوکین کی شناخت دیویندرا (48 سال)، نرملا (45 سال)، چئیترا (9 سال) اور چئیتنا (9 سال) کے طور پر کی گئی ہے ۔ 
    
معلوم ہوا ہے کہ دیویندرا میسورو کے وانی ولاس ایکسٹینشن کا رہنے والا تھا اور اس کی لیتھ اور شٹر کی فیکٹری تھی جس میں 8 ملازم تھے ۔ ڈیتھ نوٹ سے پتہ چلا ہے کہ دیویندرا مالی دشواریوں میں پھنسا تھا اور کاروبار کے لئے کے لئے لیا گیا قرضہ اتارنے میں ناکامی کی وجہ سے اس نے یہ انتہائی قدم اٹھایا ۔