منگلورو:24؍فروری (ایس اؤ نیوز)منگلورو کے منی ودھان سودھاکے روبرو سروئیر گنگا دھر کو 20 ہزار روپئے رشوت لیتے ہوئے اے سی بی پولس ٹیم نے رنگے ہاتھوں گرفتار کرلیا۔
اطلاع کے مطابق شہر کے ایک سرمایہ دار نے اپنے دفتری اشیاءکی تیاری کے لئے اپنے گھر کے صحن میں موجود ساگوانی درخت کاٹنے کے لئے محکمہ فاریسٹ سے منظوری کے لئے درخواست دی تھی۔ منگلورو شہر کے فاریسٹ محکمہ نے متعلقہ عرضی کو محکمہ روینیو کو ارسال کی تھی۔ عرضی دے کر ایک مہینہ گزرنے کے بعد بھی سروئیر گنگادھرمتعلقہ جگہ کے معائنہ کے لئے نہیں آیا اور 3ہزار روپئے رشوت کی مانگ کی۔عرضی دار سرمایہ دار نے محکمہ روینیو کی 600روپئے فیس ادا کرنے کے بعد 3000روپئے رشوت بھی دی ، اس کے ایک مہینےکے بعد بھی جگہ کے معائنہ کے لئے سروئیر نہیں آیا تو سرمایہ دار نے وضاحت چاہی ۔ اس وقت سروئیر نےجگہ کا نقشہ دینے کےلئے 30,000روپئے کی مانگ رکھی۔
سروئیر کی رشوت ستانی سے بیزار ہوکر سرمایہ دار نے منگلورو ماحولیاتی تحفظ کمیٹی کے ممبران کو اطلا ع دی۔ اس کے بعد معاملے کو لےکر منگلورو اے سی بی انسپکٹر شیام سندر کو جانکاری دی۔ منگل کی شام منگلورو کے منی ودھان سودھا کے سامنے سروئیر گنگا دھرنے جیسے ہی 20ہزاروپئے رشوت قبول کی، اے سی بی شعبہ کی پولس ٹیم نے چھاپہ مار دیا اور گنگادھر کو رشوت لیتے ہوئے رنگے ہاتھوں گرفتار کرلیا۔