بنٹوال کی شادی تقریب میں کورگجا کا بہروپ اختیارکرنے کے الزام میں دو گرفتار
بنٹوال:11؍ جنوری (ایس اؤ نیوز) پچھلے دنوں منعقد ہوئی ایک شادی کی تقریب کے دوران دولھے نے دلہن کے گھر جاتے وقت ہندو دئیوا "کورگجّا" کا بہروپ اپنایا تھا ۔ اس معاملہ میں کارروائی کرتے ہوئے وٹلا پولیس نے دو ملزمین کو گرفتار کیا ہے جن کی شناخت احمد مجتبیٰ (28 سال) اور محی الدین مونس (19 سال) کے طور پر کی گئی ہے۔
مسلم نوجوانون کی اس حرکت پر تنازع کھڑا ہوگیا اور غیر مسلم افراد کی جانب سے اس ضمن میں پولیس اسٹیشن میں شکایت درج کرواتے ہوئے مطالبہ کیا گیا تھا کہ ہندووں کے مذہبی جذبات کو ٹھیس پہنچانے کے قصور وار افراد کے خلاف قانونی کارروائی جائے ۔ مسلم سماجی لیڈران کی طرف سے بھی اس کی کڑی مذمت کی گئی تھی ۔ اسی کے ساتھ دولھے نے بیان جاری کرتے ہوئے معافی مانگتے ہوئے کہا تھا کسی کے جذبات کو ٹھیس پہنچانا اس کا مقصد نہیں تھا۔
بتاتے چلیں کہ متعلقہ معاملے کو لے کر ہندو جاگرن ویدیکے نے وٹلا بند کا بھی اعلان کیاتھا مگر بند منانے سے پہلے ہی پولس نے دو ملزموں کو گرفتارکرلیا ۔