بھٹکل:25؍اکتوبر(ایس اؤ نیوز)اچانک امڈآئے ’کیار ‘ طوفان کی وجہ سے ساحلی پٹی سمیت بھٹکل تعلقہ اور ساحلی کنارے پر لوگوں کو کافی مشکلات کا سامنا کرنا پڑا ہے، جمعہ کو بھی طوفانی موجیں ساحل سے ٹکرانے سے ساحلی کناروں کے مکین خوف وہراس میں مبتلاہیں۔
طوفانی ہواؤں کی وجہ سے درختوں کا زمین بوس ہونا جاری ہے، تعلقہ میں کئی مقامات پر درختوں کے گھروں پر گرنےکی خبریں موصول ہوئی ہیں۔ 11سےز ائد بجلی کےکھمبے بھی گرنے کی محکمہ ہیسکام نے خبر دی ہے، زوردار ہواوں کے نتیجے میں ساحلی کناروں پر واقع کئی گھروں اور دکانوں کی چھتیں اڑ گئی ہیں۔ ہیبلے ،تنگنگنڈی کی مکین لکشمی سنیا نائک، شرالی کے ماستی ایرپا نائک، اکمانائک، منجوناتھ نائک جالی وغیرہ کے گھروں کی چھتیں اڑنے کی اطلاعات موصول ہوئی ہیں۔ جالی اور تنگنگنڈی میں مچھلی کے شکار کی چھوٹی چھوٹی کشتیاں آپس میں ٹکرانےکی بھی واردات پیش آئی ہے جس کی وجہ سے کافی نقصانات ہوئے ہیں۔ شرالی ، الویکوڑی کے ہونما بھئیرا نائک کے گھر کی دیوار گر گئی ہے، ہیبلے گرام پنچایت حدود کے منجوناتھ جٹگا نائک کی ملکیت والے گوڈس رکشا پر ناریل کا درخت گرنے سے رکشا کو کافی نقصان پہنچا ہے۔ محکمہ تحصیل کے افسران جائے وقوع کا دورہ کرتےہوئے معائنہ کررہے ہیں۔ جمعرات کی صبح 8بجے سے لےکر جمعہ کی صبح 8بجے تک بھٹکل میں 70ملی میٹر بارش ریکارڈ کی گئی ہے، اب تک بارش کی کل پیمائش 5294.4 ملی میٹر درج کی گئی ہے۔ جمعہ کی دوپہر کے بعد تیز رفتار بارش جاری رہنے سے مزید دودنوں تک اسی طرح کا موسم جاری رہنے کے امکانات ظاہر کئے گئے ہیں۔
گزشتہ دودنوں سے مرڈیشور کے ساحل پر جاری طوفانی ہواؤں کا زور آج بھی ویسا ہی رہا۔ ساحل پر نمکین پانی پھیل گیا ہے، سڑک پر بھی پانی بہتا دیکھا گیا ، حالات کے پیش نظر کڑی نگرانی کی جارہی ہے۔ ماہی گیر کشتیوں کو محفوظ مقامات پر منتقل کرنےکا کام جاری ہے، ساحل پر باکڑا دکانوں کا بیوپار وغیرہ پوری طرح بند ہے ، سیاحوں کی آمد بھی رک گئی ہے۔
کیار طوفان کی وجہ سے مشینی بوٹ، ماہی گیرکشتیوں سمیت چھوٹی چھوٹی مچھلی کا شکار کرنے کی کشتیوں کی ماہی گیری پر بھی مکمل پابندی عائد کی گئی ہے۔ بوٹ اور کشتیا ں ساحل پرلنگر ڈالنے کی وجہ سے ماہی گیر اپنی مزدوری سے محروم ہوگئے ہیں۔ ہوائی طوفان کی وجہ سے جال بچھا کر مچھلی شکار پر پابندی عائد ہونے سے ساحل پر جہاں تہاں جال پڑےہوئے ہیں اور جہاں جگہ ملی وہاں کھڑے ہوکر جال بچھاتے ہوئے مچھلی شکار کرنےو الے ماہی گیر بھی سمندر میں اونچی اُٹھتی تیز لہروں سے خوف کھا کر گھروں میں وقت گزارنے پر مجبور ہیں۔ حالیہ طوفان کی وجہ سے سب سے زیادہ نقصان ماہی گیروں کو پہنچنے کاخدشہ ظاہر کیاگیا ہے۔