بھٹکل ،17؍ اکتوبر (ایس او نیوز)کونکن ریلوے سروس کے 31 سال مکمل ہونے پر ورچیول جشن منایا گیا اور اس موقع پر سورتکل - انکولہ کے درمیان مال بردار ٹرکس / کنٹینرس  لے جانے والے ٹرکس کی نقل و حمل کے لئے رول آن - رول آف (رو - رو) سروس کا شروع کرنے کا اعلان کیا گیا ۔

خیال رہے کہ اس وقت کونکن ریلوے روٹ پر 42 جوڑی میل / ایکسپریس گاڑیاں اور 5 جوڑی پاسنجر گاڑیاں چلتی ہیں ۔ امسال گنیش تہوار کے موقع پر 256 گنیش اسپیشل گاڑیاں چلائی گئی تھیں ۔ اب رو رو سروس شروع کرنے کے بعد توقع کی جارہی ہے کہ اس سے  کونکن ریلوے کی آمدنی میں مزید اضافہ ہوگا۔ 

معلوم ہوا ہے کہ کونکن ریلوے روٹ پر بجلی کرن (الیکٹریفکیشن) کا کام امسال دسمبر تک مکمل ہوجائے گا ۔ مڈگاوں اور میزورم کے درمیان آٹومیٹک بلاک سگنلنگ بھی شروع ہونے جارہی ہے ۔ کونکن ریلوے کے انجینئرنگ شعبہ کی کوششوں سے دریائے چناب پر پل کے کمانوں کا کام بھی امسال مکمل ہونے کی توقع ہے ۔ بتایا جاتا ہے کہ کونکن ریلوے کی بہترین کارکردگی دیکھتے ہوئے نیپال کے جیا نگر اور کورتھا میں ریلوے سروس شروع کرنے مانگ کی گئی ہے ۔ یہ کونکن کو ریلوے کو ملنے والا پہلا تجارتی اور بین الاقوامی آفر ہے ۔