منگلورو سرحد سے واپس لوٹائی گئی خاتون نے ایمبولینس میں ہی بچی کو جنم دیا
کاسرگوڈ،27/مارچ (ایس او نیوز) کوروناوائرس کی وجہ سے لاک ڈاؤن کی وجہ سے بعض دفعہ انتہائی پریشان کن صورتحال کا سامنا کرنا پڑرہا ہے۔ چونکہ کیرالہ اور دیگر اضلاع اور یاستوں کی کرناٹکا سے جڑنے والی سرحدوں کو بند کردیا گیا ہے،اس سے علاج کے لئے بھی لوگوں کا منگلورو میں آنا مشکل ہوگیا ہے۔
ایسا ہی ایک واقعہ کاسرگوڈ کے کنجاتور کی حاملہ خاتون کے ساتھ پیش آیا۔ اس کو زچگی کا درد شروع ہونے کے بعد ایمبولینس کے ذریعے منگلورو لایاجارہا تھا۔ مگر منگلورو میں داخلے کے تمام راستے یا تو پوری طرح بند کیے گئے ہیں یا پھر ان کی کڑی نگرانی کی جارہی ہے۔ جب مذکورہ خاتون کو لے کر ایمبولینس منگلورو کی سرحد پر پہنچی تو وہاں پر موجود عملے نے کسی بھی قیمت پر ایمبولینس کو منگلورو میں داخلے کی اجازت نہیں دی۔
جب مایوس ہوکر ایمبولینس کو واپس کاسرگوڈ ضلع اسپتال کی طرف لے جایاجارہا تھا تو مذکورہ خاتون نے ایمبولینس میں ہی بچی کوجنم دے دیا۔ شکر ہے کہ زچہ اور بچہ بعافیت اسپتال پہنچ گئے اور کسی قسم کی سنگین حالت سے گزرنا نہیں پڑا۔