انجمن حامئی مسلمین بھٹکل کے سابق صدر اور سماجی قائد عبدالرحیم جوکاکو امریکہ میں انتقال کر گئے
بھٹکل یکم/مارچ (ایس او نیوز) بھٹکل کے قومی مرکزی تعلیمی ادارہ انجمن حامئی مسلمین کے سابق صدر اور سماجی قائد جناب عبدالرحیم جوکاکو (82) امریکی شہر لاس اینجلیس میں انتقال کرگئے۔ انا للہ وانا الیہ راجعون
مرحوم اپنے اہل و عیال کے ساتھ امریکہ میں رہائش پزیر تھے اور پچھلے کچھ دنوں سے ڈھلتی عمر سے متعلقہ امراض کی وجہ سے اسپتال میں زیر علاج تھے۔آپ کے پس ماندگان میں دو فرزندان اور تین دختران کے علاوہ سیکڑوں قرابت دار اور چاہنے والے شامل ہیں۔
جناب عبدالرحیم مرحوم کی پیدائش 1940 میں ہوئی تھی۔ آپ کی ابتدائی تعلیم بھٹکل کے سرکاری بورڈ اسکول میں اور ثانوی تعلیم مڈیکیرے [کورگ] میں مکمل ہوئی۔ آپ نے یونیورسٹی کالج بنگلورو سے 1963میں میکانیکل انجینئرنگ میں گریجویشن کیا پھر انڈین انسٹی ٹیوٹ آف ٹیکنالوجی میرٹھ سے سند فراغت حاصل کی۔ مدراس [ چینئی] اور بنگلورو کے کچھ اہم اور بڑے صنعتی اداروں میں بحیثیت انجینئر آپ نے 16سال تک خدمات انجام دیں ۔ اس کے بعد آپ نے دبئی حکومت کے فیڈرل الیکٹری سٹی اینڈ واٹر اتھاریٹی میں چیف انجینئر کی حیثیت سے 25برس تک خدمات انجام دیں۔
آپ زندگی بھر وطن عزیز کے تعلیمی اور سماجی اداروں سے جڑے رہے اور قومی و ملی خدمات کی انجام دہی میں مصروف رہے۔ 1987میں آپ انجمن کی مجلس انتظامیہ کے لئے منتخب ہوئے۔ 2003 - 07 تک انجمن کے نائب صدر، 2007- 15تک جنرل سیکریٹری اور 2015 - 20 تک آپ انجمن کے صدر کے عہدے پر فائز رہے۔
کرناٹک کے سابق وزیر جناب جوکاکو شمس الدین مرحوم کے فرزند عبدالرحیم جوکاکو بھٹکل مسلم جماعت دبئی کے سکریٹریٹری، نائب صدر اور صدر کے طور پر بھی خدمات انجام دے چکے ہیں۔ جماعت المسلمین بھٹکل، مجلس اصلاح و تنظیم بھٹکل، بھٹکل مسلم جماعت بنگلورو اور بھٹکل مسلم خلیج کاونسل وغیرہ سے بھی آپ منسلک تھے۔جبکہ دبئی میں ملازمت کے دوران ساحل آن لائن کے قیام کے لئے بھی آپ نے ایڈیٹرساحل آن لائن عنایت اللہ گوائی کے ساتھ مل کر کافی جدوجہد کی تھی اور ساحل آن لائن کے ذریعے منعقدہ پروگراموں میں آپ میڈیا کی اہمیت اور اس کی ضرورت پر کئی بار خطاب کرتے ہوئے ذمہ داران قوم اور نوجوانوں کو اس بات پر اُبھارا تھا کہ ساحل آن لائن قوم کی ضرورت ہے لہٰذا ہمیں اس میڈیاکو مضبوط کرنے کی ضرورت ہے۔
عبدالرحیم جوکاکو صاحب کی رحلت پرانجمن حامئی مسلمین کے صدر جناب قاضیا مزمل صاحب کے علاوہ شہر اور بیرون ہند کے دینی، ملی، سماجی اور تعلیمی اداروں کے ذمہ داران نے گہرے رنج و ملال کا اظہار کیا ہے۔
ان کے خاندانی ذرائع سے ملی معلومات کے مطابق عبدالرحیم جوکاکو مرحوم کی تدفین کل 2/ مارچ کو لاس اینجلیس میں شام کے وقت انجام دی جائے گی۔
تعزیتی جلسہ: جناب عبد الرحیم جوکاکو کی وفات پر کل منگل بعد نماز عصر انجمن کالج مسجد (انجمن آباد) میں تعزیتی اجلاس منعقد کیا گیا ہے جس میں عوام الناس سے کثیر تعداد میں شریک ہونے کی درخواست کی گئی ہے۔