منگلورو،26 / ستمبر (ایس او نیوز) مینگلورو سے قریب 80 کلو میٹر دور ضلع  دکشن کنڑا  کے کڈبا میں واقع مردالا بدریہ جامع  مسجد کے احاطے میں   دیر  رات گھس کر جئے شری رام کے نعرے لگانے والے دو ملزمین کو پولیس نے گرفتار کر لیا  ہے جن کی شناخت  کیرتن رائے  اور سچن پجاری  کے طور پر کی گئی ہے۔

ذرائع سے پتہ چلا ہے کہ یہ دونوں اتوار دیر رات قریب گیارہ بجے  بائک پر آئے تھے، باہر بائک رکھ کر سیدھے مسجد کے احاطے میں گھس گئے اور جئے شری رام کے نعرے لگانے لگے۔  آواز سن کر جیسے ہی  مسجد کے امام صاحب باہر نکلے تو دونوں ملزمین موقع پر سے فرار ہوگئے ۔ 
    
چونکہ یہ پورا منظر مسجد میں لگے سی سی ٹی وی کیمرے میں قید ہوگیا ہے، اس بنیاد پر پولیس نے تحقیقات کرتے ہوئے ملزمین کو گرفتار کر لیا ہے ۔ مزید تحقیقات جاری ہے ۔

واقعے کو لے کر  ایک سینئر پولیس افسر نے بتایا کہ ’’مسجد چار دیواری سے گھری ہوئی ہے۔واقعہ کے وقت مسجد کے امام اور مسجد کمیٹی کے سربراہ اپنے دفتر میں موجود تھے۔ جب وہ باہر نکلے تو انہوں نے دیکھا کہ دو نامعلوم افراد مسجد سے نکل رہے ہیں۔ انہوں نے فوراً مسجد کی سی سی ٹی وی فوٹیج ا سکین کی۔  مسجد کمیٹی کے رکن محمد فاضل نے بتایا  کہ یہ علاقہ ہندو اور مسلم برادریوں کے درمیان ہم آہنگی کے کے لیے جانا جاتا ہے۔ یہی وجہ ہے کہ ہندو مسلم  اتحاد کو شرپسند عناصر  برداشت نہیں کرپارہے ہیں اور فرقہ وارانہ منافرت اور کشیدگی پیدا کرنے کی کوشش کی جارہی ہے۔