اسرائیل نے غزہ پر حملے جاری رکھے تو تنازع بڑھے گا: ایرانی صدر ابراہیم رئیسی
تہران ، 16/اکتوبر (ایس او نیوز /ایجنسی) ایرانی صدر ابراہیم رئیسی نے اتوار کو خبردار کیا کہ اگر اسرائیل نے غزہ پٹی پر حملے جاری رکھے تو تنازع میں مزید اضافہ ہو گا۔
رئیسی نے فرانس کے صدر ایمانوئل میکرون کے ساتھ فون پر گفتگو میں کہا کہ اگر صیہونی حکومت ان جرائم (فلسطینیوں کے خلاف) جاری رکھ کر اپنی شکست کی قیمت چکانا چاہتی ہے تو جنگ میں توسیع ہو گی۔
ایرانی صدر کے دفتر کی ویب سائٹ پر شائع ہونے والے ایک بیان کے مطابق مسٹر رئیسی نے گذشتہ چند دنوں کے دوران فلسطینیوں پر اسرائیل کے حملوں کی شدید مذمت کی اور فلسطینی عوام کی حمایت میں نکالی جانے والی ریلی کو روکنے پر فرانسیسی حکومت کو تنقید کا نشانہ بنایا۔
فرانسیسی صدر نے اپنی طرف سے غزہ پٹی میں بحران کی شدت پر تشویش کا اظہار کیا اور ایران سے مطالبہ کیا کہ وہ خطے کی صورتحال پر قابو پانے کے لیے اپنا بااثر کردار ادا کرے۔ تاہم، مسٹر رئیسی نے کہا کہ ’’احتجاجی گروپ اپنے فیصلے خود لے سکتے ہیں۔‘‘
واضح رہے کہ فلسطین کی اسلامی مزاحمتی تحریک (حماس) نے 7 اکتوبر کو اسرائیل پر ہزاروں راکٹوں سے حملہ کیا اور بڑی تعداد میں دہشت گردوں کے ساتھ اچانک دراندازی کی۔ اس کے جواب میں اسرائیل نے غزہ پر وسیع فضائی حملے کیے ہیں۔ تنازعہ جاری ہے، اور نویں دن میں، دونوں اطراف کے تقریباً 4,000 افراد ہلاک اور بہت سے زخمی ہو چکے ہیں۔
