دبئی 9/نومبر (ایس او نیوز) متعدد ملکوں میں بڑی کمپنیوں کا سسٹم ہیک کرنے والے  بین الاقوامی گروہ کو دبئی پولیس نے گرفتار کرلیا ہے۔ میڈیا رپورٹ کے مطابق  یہ گروہ معروف کمپنیوں کے سی ای اوز اور ڈائریکٹرز کے ای میلز ہیک کرکے وارداتیں  انجام دے رہا  تھا۔ 

دبئی پولس کے توسط سے الامارات الیوم  میں شائع رپورٹ کے  مطابق    ہیکرز نے 36 ملین ڈالر دومرحلوں میں ملک سے باہر بھیجے تھے۔ پولیس کے ماتحت ای کرائمز کی سپیشل ٹیم  ہیکرز کی سرگرمیوں پر نظر رکھے ہوئے تھی۔  بتایا گیا ہے کہ ہیکرز کا تعلق مختلف ممالک سے ہے۔ ان کا گروہ  43 افراد پر مشتمل تھا۔ گروہ کا سرغنہ جو کہ بیرون ملک میں مقیم ہے کی شناخت کرلی گئی ہے۔ دیگر 20 ملزمان کا پتہ لگالیا گیا ہے۔ گروہ کی گرفتاری میں انٹرپول سے تعاون حاصل کیا گیا ہے۔

دبئی پولیس کا کہنا ہے کہ  ہیکرز کو حراست میں لینے کی کارروائی ’مونوپولی آپریشن‘ کے نام سے انجام دی گئی۔

رپورٹ میں بتایا  گیا ہے کہ   کاروائی  اُس وقت شروع کی گئی   جب ایک ایشیائی ملک کی کمپنی کے وکیل نے  ای کرائم پورٹل کے ذریعے دبئی پولیس سے شکایت کی کہ ایک بین الاقوامی گروہ کمپنی کے سی ای او کا ای میل ہیک کرنے میں کامیاب ہوگیا ہے۔ وکیل نے اس حوالے سے ضروری تفصیلات پولیس کو پیش کردی تھیں۔