منگلورو28؍مارچ (ایس او نیوز) پانڈیشور پولیس نے تین بدنام زمانہ بین الریاستی چوروں کو گرفتار کیا اور قبضے سے 4.4 لاکھ روپے مالیت کا مسروقہ مال بر آمد کرلیا ہے۔ گرفتار شدہ ملزمین کے نام انیل کمار(۲۸سال)، ویریندراشیٹی(۴۰سال) اور عبدالرحیم عرف چَپّے تنّی رحیم (۴۲سال) بتائے جاتے ہیں۔ پولیس کے بیان کے مطابق ان چوروں کی گرفتاری کیرالہ کے کوئیلانڈی پولیس اسٹیشن میں درج ایک کیس کے تعلق سے ہوئی ہے۔ملزمین کے قبضہ سے کوئیلانڈی کے ایک مکان سے چوری کیے گئے 136گرام وزنی سونے کے زیورات، ایک دوسرے مکان سے چرایا گیا ٹیلی ویژن سیٹ اور کولشیکر میں واقع ایک گھر سے چرائے گئے تانبے کے برتن برآمد کیے گئے ہیں۔ ان سب چیزوں کی مجموعی مالیت کا اندازہ 4.4لاکھ روپے لگایا گیا ہے۔

گرفتار شدہ ملزمین میں سے انیل کمار کے خلاف کاروار پولیس اسٹیشن میں چوری کے تین معاملات، اڈپی پولیس اسٹیشن میں دو معاملات، کوزی کوڈ پولیس اسٹیشن میں ایک معاملہ اور کالیکٹ میڈیکل کالج پولیس اسٹیشن میں تین چوری کے معاملات درج ہیں۔جبکہ ویریندرا کے خلاف سورتکل، بنٹوال اور منجیشور پولیس اسٹیشن میں چوری کے معاملات درج ہونے کے علاوہ کوناجے پولیس اسٹیشن میں قتل کی کوشش کا کیس بھی درج ہے۔تیسرے ملزم عبدالرحیم کے بارے میں بتایا جاتا ہے کہ منگلورو نارتھ پولیس اسٹیشن میں درج قتل کی کوشش کے دو معاملات میں وہ ملزم ہے۔ اس کے علاوہ برکے پولیس اسٹیشن، پانمبور، کوسٹل سیکیوریٹی اور منگلورو ایسٹ پولیس اسٹیشن میں گانجہ فروشی کے معاملات بھی اس پر درج ہیں۔معلوم ہوا ہے کہ سال 2017میں اس کے خلاف غنڈہ ایکٹ بھی لاگو کیا گیا تھا۔

بین الریاستی چوروں کی اس ٹولی کوگرفتار کرنے کی مہم میں منگلورو سینٹرل کے اے سی پی سدھیر ہیگڈے کی قیادت میں پانڈیشور پولیس اسٹیشن کے انسپکٹر کمار آرادھیا کی ٹیم نے کامیابی سے انجام دی ، جس کی نگرانی پولیس کمشنر سندیپ پاٹل ، ڈی سی پی ہنومنتھ رایا اور ڈی سی پی اوما پرشانت نے کی۔