بھٹکل 26 جون (ایس او نیوز) ملک میں ایک طرف رسولﷺ کی شان میں گستاخی کرنے کے واقعات میں اضافہ دیکھا جارہا ہے اور مسلم مخالف تنظیمیں گستاخ رسول نپور شرما کی حمایت میں بعض علاقوں میں احتجاج کرتے ہوئے اُسے صحیح ٹہرانے کی کوشش بھی کررہے ہیں، تو وہیں بھٹکل میں اسٹوڈینٹس اسلامک آرگنائزیشن (ایس آئی او) کی جانب سے محمد ﷺ کی صحیح تعلیمات کو عام کرنے، حضور پاک ﷺ کے تعلق سے پھیلی غلط فہمیوں کو دور کرنے اور ان کا صحیح تعارف پیش کرنے بھٹکل کے مختلف محکموں کے آفسران و سیاسی لیڈران سے ملاقات کی جارہی ہے ۔
ایس آئی او کی جانب سے جاری کی گئی پریس ریلیز میں بتایا گیا ہے طلبہ تنظیم ایس آئی او کے کارکنان اس تعلق سے بھٹکل اسسٹنٹ کمشنر ممتادیوی، تحصیلدار سُمنت سمیت بی جے پی سے تعلق رکھنے والے بھٹکل رکن اسمبلی سنیل نائک سے ملاقات کرچکے ہیں اور انہیں محمد ﷺ کی تعلیمات پر لکھی گئی کنڑا زبان کی کتابیں بطور تحفہ پیش کی جاچکی ہیں، مزید آفسران ولیڈران سے بھی ملاقات کرکے اُنہیں حضور اکرم ﷺ کی تعلیمات سے آگاہ کرنے کا کام جاری ہے۔
ایس آئی او کی جانب سے کیمپس سکریٹری فارقلیط مانوی، مشائخ طالش، صلاح الدین اسدی، زکوان، جرجیس خومی، حیّان خومی اور غطریف مانوی سمیت دیگر طلبہ کم از کم بھٹکل کی حد تک عوام بالخصوص سیاسی لیڈران اور سرکاری آفسران کو حضور اکرم ﷺ کے تعلق سے صحیح جانکاری فراہم کرنے کی کوشش میں لگے ہوئے ہیں۔