ایچ ڈی دیوےگوڈا کا آئندہ لوک سبھا انتخاب نہ لڑنے کا فیصلہ
نئی دہلی، 14/جنوری (ایس او نیوز/ایجنسی) رواں سال ہونے والے لوک سبھا انتخابات کو لے کر ایک طرف سیاسی پارٹیاں سرگرم ہو گئی ہیں۔ اور قومی اور ریاستی پارٹیاں منصوبہ بندی میں لگ گئی ہیں تو وہیں خبر ملی ہے کہ سابق وزیر اعظم دیوے گوڈا نے آئندہ لوک سبھا انتخاب نہ لڑنے کا فیصلہ کیا ہے۔
ان کی پارٹی جنتادل سیکولر، جس نے اسمبلی انتخابات میں بری طرح ہارنے کے بعد بی جے پی سے ہاتھ ملایا تھا نے پہلے ہی اس بات کا اعلان کرچکی ہے کہ آئندہ لوک سبھا انتخاب میں وہ بی جے پی کے ساتھ مل کر میدان میں اترے گی۔ ایسے میں لوک سبھا کی کتنی نشستیں اسے حاصل ہوں گی، اس سلسلے میں ابھی کچھ بھی مصدقہ طور پر نہیں کہا جا سکتا۔
ایچ ڈی دیوے گوڑا نے اپنے بیان میں کہا ہے کہ وہ اپنی عمر کو دیکھتے ہوئے آئندہ لوک سبھا انتخاب نہیں لڑیں گے۔ حالانکہ وہ انتخاب میں امیدواروں کے لیے تشہیر کرتے ہوئے ضرور نظر آئیں گے۔ سابق وزیر اعظم نے ایک پریس کانفرنس میں کہا کہ میں انتخاب نہیں لڑ رہا ہوں۔ میں اب 90 سال کا ہو گیا ہوں۔ ہمیں جو بھی سیٹیں ملیں گی اور جہاں بھی ضروری ہوگا، میں وہاں جاؤں گا۔ میرے پاس بولنے کی طاقت ہے اور یادداشت بھی مضبوط ہے۔ اس کے ساتھ میں انتخابی تشہیر کروں گا۔
بتاتے چلیں کہ سیکولر کہلانے والی اس پارٹی کو بی جے پی سے ہاتھ ملانے کے بعد سیکولر ووٹ ملنے کے امکانات ختم ہوچکے ہیں۔