رات بارہ بجے ہی بھٹکل میں منائی گئی یوم جمہوریہ کی تقریب؛ ہندوستانی آئین کی تجاویز پڑھ کر سنائی گئیں؛سینکڑوں لوگوں کی شرکت
بھٹکل 26/جنوری (ایس او نیوز) بھٹکل میں وی دی انڈین (بھٹکل) کی جانب سے تعلقہ اسٹڈیم کے باہر رات بارہ بجے یوم جمہوریہ کی تقریب نظر آئی جہاں عوام نے ہندوستانی آئین کی تجاویز پڑھ کر ہندوستانی دستور کے تحفظ کا عہد لیا۔
اس موقع پر شریک نوجوانوں نے قومی ترانہ جن گن من بھی پڑھ کر سنایا، جبکہ ہندوستانی آئی کی تجاویز یعنی Preamble of constitution کی کاپیاں نوجوانوں میں تقسیم کی گئیں۔
اس سے قبل 25 جنوری کو شام سے ہی سوشیل میڈیا پر ایک مسیج وائرل ہورہا تھا جس میں اس پروگرام کے تعلق سے خبر دیتے ہوئے عوام الناس کو کثیر تعداد میں تعلقہ اسٹڈیم یعنی وائی ایم ایس اے میدان میں جمع ہوکر تقریب میں شریک ہونے کی درخواست کی گئی تھی۔ متعلقہ مسیج پڑھ کر کافی لوگ رات 11:30 بجے تعلقہ اسٹڈیم کے باہر جمع ہونا شروع ہوگئے۔ اس موقع پر جب عوام نے تعلقہ اسٹدیم کے اندر جانے کی کوشش کی تو پولس نے گیٹ کے سامنے ہی اپنی وین اس انداز میں لگادی کہ داخلہ بند ہوگیا۔ پولس کو اس بات کی شکایت تھی کہ آج کے پروگرام کے تعلق سے اُنہیں خبر نہیں دی گئی۔ پولس سے نہ اُلجھتے ہوئے عوام نے میدان کے باہر ہی تقریب منعقد کرنے کا فیصلہ لیا اور جیسے ہی رات کے بارہ بجے، مصباح نامی ایک نوجوان نے بڑی آواز میں عوام کو Preamble پڑھایا ، جس کے فوری بعد سبھی لوگوں نے مل کر قومی ترانہ پڑھا۔
خیال رہے کہ حال ہی میں اے آئی ایم آئی ایم کے سربراہ اسدالدین اویسی نے شہریت قانون کی مخالفت کرتے ہوئے کہا تھا کہ ہم بھارت کے دستور کو بچانے کے لئے احتجاجاً 25 جنوری کی رات کو بارہ بجے ہی قومی ترانہ جن گن من پڑھیں گے اور عہد لیں گے کہ ہمیں ہندوستان کو اور امبیڈکر کے بنائے ہوئے ہندوستان کے آئین کو بچانا ہے۔ انہوں نے عوام الناس سے خطاب کرتے ہوئے ساتھ دینے کی اپیل کی تھی۔
واضح رہے کہ 26 جنوری صبح ٹھیک ساڑھے آٹھ بجے بھٹکل تعلقہ اسٹڈیم میں سرکاری طور پر یوم جمہوریہ تقریب کا انعقاد ہوگا۔
