ہوناور: شراوتی بیلٹ اندھیرے میں ڈوب گیا؛ 30 گھنٹوں سے الیکٹری سٹی غائب؛ عوام بالخصوص طلبا سخت پریشان
بھٹکل 3/جولائی (یس او نیوز) پڑوسی تعلقہ ہوناور کا شراوتی بیلٹ پچھلے 30 گھنٹوں سے اندھیرے میں ڈوبا ہوا ہے اور محکمہ الیکٹری سٹی علاقہ میں بروقت بجلی سپلائی کرنے میں بری طرح ناکام ہے، عوام نے شکایت کی ہے کہ منگل کی شام قریب پانچ بجے بجلی فیل ہوئی تھی اور آج بدھ رات نو بجے تک بجلی سپلائی بحال نہیں ہوپائی ہے جس سے عوام بالخصوص طلبا برادری سخت پریشان ہیں۔ اس تعلق سے ساحل آن لائن سے فون پر گفتگو کرتے ہوئے ہوناور ہیسکام کے اسسٹنٹ انجنئر نے بتایا کہ چار جگہوں پر بجلی کے کھمبوں پر درخت گرنے سے بجلی سپلائی بند ہوگئی ہے اور محکمہ نے متعلقہ علاقہ میں بجلی سروس بحال کرنے اہلکاروں کو روانہ کردیاہے۔
ہوناور تعلقہ کے سمسی سے ایک طالب العلم محمد ثاقب نے ساحل آن لائن کو فون کرتے ہوئے الیکٹری سٹی پچھلے 30 گھنٹوں سے نہ ہونے کی اطلاع دی۔ انہوں نے بتایا کہ پورا پورا دن بجلی غائب ہوجانے سے پڑھائی بری طرح متاثر ہورہی ہے اور محکمہ الیکٹری سٹی کو فون کرنے پر کسی بھی طرح کا ریسپاونس نہیں مل رہا ہے۔ انہوں نے بتایا کہ کئی بار ہوناور میں واقع ہیسکام دفتر کو فون کرکے شکایت کرنے کی کوشش کی مگر فون کوئی ریسیو ہی نہیں کرتا۔ انہوں نے بتایا کہ بارش کی شروعات کے ساتھ ہی اکثر راتوں کے اوقات میں الیکٹری سٹی فیل ہوجاتی ہے اور پوری پوری رات بجلی نہیں ہوتی۔
ہوناور تعلقہ کے سمسی کے ساتھ ساتھ پڑوسی قصبہ اُوپنّی، گیرسوپّا، ہیرانگڈی، کینگار، کوچوڑی، سڈلگی سمیت ولکی میں بھی الیکٹری سٹی دو دنوں سے نہ ہونے کی شکایتیں موصول ہوئی ہیں ، اس تعلق سے ساحل آن لائن سے فون پر گفتگو کرتے ہوئے شراوتی بیلٹ کے سماجی کارکن جناب مظفر صاحب نے بتایا کہ ان علاقوں میں پیر سے الیکٹری سٹی نہیں ہے، منگل کو کچھ گھنٹوں کےلئے بجلی بحال ہوئی تھی، پھر پورا دن اور رات بجلی نہ ہونے سے عوام کو سخت پریشانیوں کا سامنا کرنا پڑ رہا ہے۔
ہوناور تعلقہ کے شراوتی بیلٹ پر دو دنوں سے الیکٹری سٹی نہ ہونے کی شکایت موصول ہوتے ہی ساحل آن لائن نے ہوناور ہیسکام کے اسسٹنٹ ایکزی کوٹیو انجینئر سے فون پر گفتگو کی اور معاملے کے تعلق سے وضاحت چاہی تو انہوں نے بتایا کہ بارش کی وجہ سے کئی مقامات پر بجلی کے کھمبوں پر درخت گرے ہیں، مگر بجلی بحال کرنے کارکنوں کو روانہ کردیا گیاہے، جب اُن کو بتایا گیا کہ پچھلے 30 سے زائد گھنٹوں سے بجلی نہیں ہونے کی شکایتیں موصول ہوئی ہیں تو انہوں نے بتایا کہ وہ خود متعلقہ علاقوں کا دورہ کریں گے اور فوری طور پر بجلی سروس بحال کرنے کی کوشش کریں گے۔
