بھٹکل 8/ مارچ (ایس او نیوز) بھٹکل کے دونوجوانوں پر ہوناور میں ہوئے قاتلانہ حملے کو لے کر قومی سماجی ادارہ مجلس اصلاح و تنظیم بھٹکل وفد نے سخت موقف اختیار کرتے ہوئے جمعرات کی شام کو  پولس کے اعلیٰ حکام سے  بات چیت کی اور اُن پر زور دیا کہ حملہ آوروں کے خلاف سخت قانونی کاروائی کی جائے اور خاطیوں کو فوری گرفتار کیا جائے۔

تنظیم کے ایک وفد نے بھٹکل کے انچارج ڈپٹی پولس کمشنر  مسٹر جی ٹی نائک  سے ملاقات کرتے ہوئے اُن پر زور دیا کہ صرف چار لوگوں کو گرفتار کرکے پولس خاموش نہ بیٹھے بلکہ دیگر جتنے میں حملہ آور ہیں،ا ُن کی گرفتاریوں کو بھی یقینی بنائیں۔

تنظیم جنرل سکریٹری محی الدین الطاف کھروری نے وفد کی قیادت کرتے ہوئے  ڈی وائی ایس پی کو بتایا کہ شدت پسندتنظیموں کی جانب سے اگر کوئی  معاملہ پیش آتا ہے تو  اکثر معاملوں میں پولس  صرف ابتدائی طور پر کاروائی کرتی ہے  بعد میں معاملے کو ٹھنڈے بستے میں ڈال دیتی ہے۔ انہوں نے متنبہ کیا کہ اس واقعے میں ایسا نہیں ہونا چاہئے ۔ انہوں نے کہا کہ عوام کی ہمیں احتجاج کرنے کے لئے دبائو ڈال رہے ہیں، مگر ہم  نے اپنے نوجوانوں کو قابو میں رکھا ہے۔ 

نائب صدر عنایت اللہ شاہ بندری نے  ہوناور کے ایک دیہات میں ایک نوجوان پر ہوئے حملے کی مثال پیش کرتے ہوئے بتایا کہ  پولس نے  لاپتہ نوجوان کا پتہ تو لگالیا، مگر اُس تعلق سے حملہ آوروں کی گرفتاری عمل میں نہیں آئی۔ انہوں نے بھٹکل کی مندروں میں گوشت پھینکے جانے کے معاملے کی بھی مثال پیش کی اور کہا کہ ایک پی ایس آئی کی جانب سے ہوم منسٹر کو واقعے کے تعلق سے رپورٹ روانہ کرنے کے بائوجود پولس نے کسی بھی شدت پسند تنظیموں کے کارکنوں کے خلاف نہ کوئی معاملہ درج کیا اور نہ ہی کسی کی گرفتاری عمل میں آئی۔ انہوں نے کہا کہ بھٹکل کے مسلمان ہم سے جواب طلب کرتے ہیں کہ   پولس کی سست روی پر تنظیم احتجاج کیوں نہیں کرتی ۔ انہوں نے ڈی وائی ایس پی سے مطالبہ کیا کہ وہ ہوناور میں مکمل پلاننگ کے ساتھ جانوروں کی سپلائی کے نام پر جن دو لوگوں پر حملہ ہوا ہے ، اُن کے خلاف  سخت کاروائی کرے اور  حملہ کرنے والوں کو فوری گرفتار کرے۔

اس تعلق سے  محمد صادق مٹا، امتیاز اُدیاور و دیگر ذمہ داران نے بھی پولس سے سخت کاروائی کی مانگ کی ۔ محمد صدیق ڈی ایف، مولوی یاسر برماور ندوی، محمد اشفاق کے ایم، مولوی عزیزالرحمن رکن الدین ندوی،  عبدالرحیم و دیگر کافی ذمہ داران بھی تنظیم وفد میں موجود تھے۔

بھٹکل کے انچارج ڈی وائی ایس پی مسٹر جی ٹی نائک نے بتایا کہ ہوناور میں دولوگوں پر حملہ ہونے کی اطلاع ملنے کے  پندرہ منٹ کے اندر پی ایس آئی اپنی ٹیم کے ساتھ موقع واردات پر پہنچ گئے تھے، انہوں نے ہی  حملہ آوروں کے چنگل سے دونوں لوگوں کو بچاکر اُنہیں اسپتال منتقل کیا تھا اور فوری طور پر حالات پر قابو پایا تھا۔ ڈی وائی ایس پی نے تنظیم وفد کو یقین دلایا کہ پولس کسی بھی خاطی کو نہیں بخشے گی۔ انہوں نے کہا کہ گرفتاری کے خوف سے سبھی حملہ آور فرار ہوگئے ہیں،  مگر وہ زیادہ دن  قانون کے ہاتھوں میں آنے سے بچ نہیں سکیں گے۔ انہوں نے یہ بھی کہا کہ حملہ آوروں میں بھٹکل کے کچھ  نوجوان بھی شامل ہونے کی بات کا پتہ چلا ہے اور پولس  سبھی حملہ آوروں کو گرفتار کرنے  متحرک ہوگئی ہے۔اس موقع پر کاروار سے خصوصی طور پر تشریف فرما پولس کے اعلیٰ آفسر شرن گوڈا بھی موجود تھے۔