بھٹکل میں شدت کی گرمی کےبعد رات کو پھر ہوئی ہلکی بارش؛ طوفانی ہواوں سے کئی جگہوں پر درخت اور الیکٹرک کھمبے گرنے کی اطلاعات
بھٹکل 29 اپریل (ایس او نیوز) شدت کی گرمی کے بعد آج رات قریب 9:30 بجے بھٹکل میں بادلوں کی گرج اوربجلیوں کی چمک کے دوران ہلکی بارش ہوئی، جس سے موسم پھر ایک بار خوشگوار ہوگیا اور عوام کو گرمی سے راحت نصیب ہوئی ، مگر کچھ منٹوں کےلئے چلی طوفانی ہواوں سے کئی جگہوں پر درختوں کے گرنے اور الیکٹرک کھمبوں کے گرنےکی اطلاعات موصول ہوئی ہیں۔
بجلیاں گرنے کے ساتھ ساتھ کچھ دیر کے لئے ہوئی بارش کے دوران ہمیشہ کی طرح الیکٹری سٹی فیل ہوگئی، مگر اس دوران وہاٹس ایپ پر کئی ایک مسیجس بھی وائرل ہوگئے جس میں بتایا گیا تھا کہ ڈارنٹا علاقہ سے گذرنے والے لوگ احتیاط برتیں، کیونکہ الیکٹرک کھمبے گرنے کی وجہ سے جگہ جگہ الیکٹرک وائرس بھی روڈ پر بکھرے پڑے ہیں۔
اُدھر جامعہ آباد روڈ پر ایک درخت گرنے سے سڑک بند ہونےکی اطلاع بھی وہاٹس ایپ کے ذریعے وائرل ہوئی، جس کے ساتھ ہی یہ مسیج بھی وائرل ہوا کہ یہاں پی ایف آئی کے کارکنوں نے درخت کو سڑک پر سے ہٹاکر راستہ صاف کردیا ہے۔ یہاں اندھیرا زیادہ ہونے کی وجہ سے ایک اسکوٹر سوار گرے ہوئے درخت سے ٹکرا کر زخمی ہونے کی وڈیو بھی وائرل ہوئی ۔
اس موقع پر ہیسکام کے ذرائع نے بتایا کہ بھٹکل کے ڈارنٹا علاقہ میں درختوں کے گرنے سے سات الیکٹرک کھمبے بھی گرگئے ہیں جس کے نتیجے میں ہیسکام کو بھاری نقصان ہوا ہے، اسی طرح کوٹیشور روڈ پر تین الیکٹرک کھمبے، بندر میں ایک اور مُنڈلی میں بھی ایک الیکٹرک کھمبا گرا ہے۔
رات قریب گیارہ بجے بھٹکل میں بجلی بحال کی جاچکی ہے اور کچھ دیر کے لئے ہوئی بارش اور ٹھندی ہواوں کے جھونکوں کے بعد موسم بھی یکلخت تبدیل ہوگیا ہے جس سے عوام کو گرمی سے ایک حد تک نجات مل گئی ہے اور عوام راحت کی سانس لے رہےہیں۔
بتاتے چلیں کہ رمضان کا مہینہ شروع ہوتے ہی بھٹکل میں شدت کی گرمی بھی شروع ہوچکی ہے، لیکن شام اور رات کے اوقات میں کئی بار ہلکی ہلکی بارش ہونے سے گرمی کی شدت میں بھی کمی پائی جاتی رہی ہے، آج پورا دن عوام شدت کی گرمی محسوس کررہے تھے لیکن رات ہوتے ہی بارش نے عوام کو راحت دلائی ۔