اڈپی : مسلسل برسات نے عام زندگی کردی درہم برہم ۔ کئی علاقے ہوگئے زیر آب ۔ گھروں کے اندر گھس آیا پانی
اڈپی 18/ جولائی (ایس او نیوز) ضلع میں کل سنیچر کی رات سے جو لگاتار بارش ہو رہی ہے اس سے کئی علاقوں میں مصنوعی سیلاب کی کیفیت پیدا ہونے کے ساتھ عام زندگی درہم برہم ہوگئی ہے ۔
موصولہ رپورٹ کے مطابق اڈپی شہر کے کئی مقامات زیر آب ہوگئے ۔ بہت سے مقامات پر مین ہول ابل پڑے اور برساتی پانی کے ساتھ گٹر کے گندے پانی سے سڑکیں ڈوب گئیں ۔ کاپ، ماجور، ماتادابیٹّو اور کالسنکا جیسے علاقوں میں گھروں کے اندر پانی گھس آیا ۔ کرشنا مٹھ کی پارکنگ لاٹ ، بیلکیرے اور نیٹور کے علاقے سیلاب کا منظر دکھا رہے ہیں ۔
چونکہ ضلع کی تمام ندیاں برساتی پانی سے ابل پڑی ہیں اس لئے ندی کنارے رہنے والے لوگوں کو محفوظ مقامات پر منتقل ہونے کے لئے انتظامیہ کی جانب سے وارننگ جاری کی گئی ہے ۔
محکمہ موسمیات کی پیش گوئی کے مطابق ضلع میں پیر کے دن بھی تیز بارش جاری رہنے کے امکانات ہیں ۔