اُترکنڑا ؛ بارش میں کمی مگر جگہ جگہ نقصانات کو دیکھتے ہوئے کل تیسرے دن بھی ضلعی انتظامیہ نے کیا اسکولوں اور کالجوں میں چھٹی کا اعلان؛
بھٹکل 7/اگست (ایس او نیوز) ضلع اُترکنڑا میں ویسے تو بارش میں کافی کمی آگئی ہے لیکن ہوناور، کمٹہ، انکولہ اور کاروار کے دیہاتوں میں راستے ٹوٹ جانے اور دیہاتوں میں بھاری مقدار میں پانی جمع ہوجانے سے سینکڑوں لوگ متاثر ہوئے ہیں اور کافی لوگوں کو راحت کیمپوں میں بسایا گیا ہے۔ عوام کی پریشانیوں اور دور دراز علاقوں کے لوگوں کو اسکول اور کالج میں پہنچنے کی دقتوں کو دیکھتے ہوئے ضلعی انتظامیہ نے کل جمعرات 8/اگست کو بھی انگن واڑی مراکز، اسکول اور کالجس میں چھٹی کا اعلان کیا ہے اور سبھی بچوں کو ہدایت دی ہے کہ وہ کل بھی اسکول اور کالج نہ جائیں۔
ڈپٹی کمشنر ڈاکٹر ہریش کمار نے ساحل آن لائن سے فون پر گفتگو کرتے ہوئے عوام بالخصوص دوسری ریاستوں کے سیاحوں سے درخواست کی ہے کہ وہ اگلے دو چار دنوں کے لئے سیاحت کے لئے اُترکنڑا نہ آئیں جہاں بارش سے کافی نقصانات ہوئے ہیں اور جگہ جگہ پانی جمع ہوجانے سے کئی جگہوں پر راستے بند ہیں۔ انہوں نے بتایا کہ کئی جگہوں پر درختوں کے گرنے سے روڈ بند ہیں تو کئی جگہوں پر پہاڑی یا چٹان کھسکنے کی وارداتوں کے بعد راستوں میں رکاوٹیں پیدا ہوگئی ہیں۔
خیال رہے کہ انکولہ۔یلاپور نیشنل ہائی وے 63 جو منگل شام قریب چار بجے پانی میں ڈوبا تھا اور ندی کا پانی ہائی وے پر سے گذرنے کی وجہ سے ہائی وے بند ہوگیا تھا، آج شام پانچ بجے رپورٹ تیار ہونے تک بھی بند ہی تھا۔ یلاپور کے ذرائع نے فون پر بتایا کہ ہائی وے کے دونوں کنارے آج بھی سینکڑوں گاڑیوں کی لمبی قطار لگی ہوئی ہے اور لوگ ہائی وے کھلنے کے انتظار میں ہیں۔ ویسے سرسی یا ہبلی جانے کے لئے عوام کمٹہ ۔سرسی روڈ سے بھی جاسکتے ہیں جہاں کی سڑک عارضی طور پر بند ہونے کے بعد سواریوں کے لئے کھل چکی ہے۔
بھٹکل میں بھی آج مطلع آبر آلود رہا اور وقفے وقفے سے بارش بھی جاری رہی، البتہ عام بارش ریکارڈ کی گئی۔
3407 لوگوں کو راحت سینٹر پہنچایا گیا: ڈپٹی کمشنر ڈاکٹر ہریش کمار نے بتایا کہ 5 اور 6 اگست کو جو زبردست بارش ہوئی تھی اور اُس سے جن جن علاقوں میں پانی بھر گیا تھا ، بارش سے متاثرہ علاقوں سے اب تک جملہ 3407 لوگوں کو اُن کے گھروں سے نکال کر راحت کیمپوں میں پہنچایا گیا ہے۔ انہوں نے بتایا کہ ضلع بھر میں جملہ 49 راحت کیمپ لگائے گئے ہیں اور راحت کیمپوں میں بارش سے متاثرہ لوگوں کے لئے کھانے کا بھی بندوبست کیا جارہا ہے۔
ڈپٹی کمشنر نے بتایا کہ پہاڑی اور ملناڈ علاقوں میں ہوئی زبردست بارش کے نتیجے میں کمٹہ سب سے زیادہ متاثر ہوا ہے اور ملناڈ علاقوں کا پانی کمٹہ کی طرف بہنے سے کافی دیہات پانی میں ڈوب گئے ہیں، کمٹہ میں جملہ 16 راحت سینٹر بنائے گئے ہیں اور متاثرہ علاقوں سے لوگوں کو راحت سینٹر منتقل کیا گیا ہے۔ اسی طرح ہوناور کے شراوتی بیلٹ میں کافی لوگ بارش سے متاثر ہوئے ہیں اور متاثرہ علاقوں سے لوگوں کو بحفاظت نکال کر اُنہیں 14 مختلف راحت کیمپوں میں منتقل کیا گیا ہے۔ کاروار اور انکولہ میں چھ چھ راحت سینٹر، یلاپور، سداپور اور ڈانڈیلی میں دو دو سینٹرس اورہلیال میں ایک راحت کیمپ لگایا گیاہے۔
