اسمبلی الیکشن کے لئے کانگریسی امیدواروں کی فہرست اپریل کے پہلے ہفتے میں جاری ہوگی۔ ریاستی صدر پرمیشور کا بیان
ہاسن 19؍مارچ (مدثر احمد/ایس او نیوز) کانگریس پارٹی کے ریاستی صدر ڈاکٹر جی پرمیشور نے اخبار نویسوں سے خطاب کرتے ہوئے بتایا کہ ودھان سبھا الیکشن کے لئے کانگریسی امیدواروں کی فہرست تیار کی جارہی ہے اور اپریل کے پہلے ہفتے میں جاری کیے جانے کی امید ہے۔
پرمیشور کے مطابق بشمول این اے حارث پارٹی کے تمام موجودہ اراکین اسمبلی کو ٹکٹ دینے کا فیصلہ کیا گیا ہے۔اس کے علاوہ دیگر مقامات پر سیٹ جیتنے کی طاقت رکھنے والے امیدواروں کو ضرور موقع دیا جائے گا۔پرمیشور نے مزیدبتایاکہ جنتادل (ایس )سے بغاوت کرنے والے اراکین اسمبلی 25مارچ کو کانگریس میں شامل ہونے کا امکان ہے۔
انہوں نے کہا کہ الیکٹرانک ووٹنگ مشین کے استعمال کے خلاف الیکشن کمیشن کے پاس اعتراض درج کرواتے ہوئے اس بار الیکشن میں بیلیٹ پیپر کا استعمال کرنے کی مانگ کی گئی ہے۔سابق وزیر اعلیٰ اور کانگریس کے معروف لیڈر ویرپا موئیلی کے اختلافی ٹویٹ کے سلسلے میں پوچھنے پر پرمیشور نے کہا کہ اس معاملے میں ویرپّا موئیلی کے فرزند ہرش موئیلی کو وجہ بتاؤ نوٹس جاری کی گئی ہے ، اس کا جواب آنے پر مناسب کارروائی کی جائے گی۔
پرمیشور کے مطابق لنگایت اور ویر شیوا طبقات کاجو تنازعہ سے اس میں کانگریس پارٹی کا کوئی رول نہیں ہے۔اشوک کھینی کو کانگریس میں شامل کیے جانے کے تعلق سے انہوں نے بتایا کہ کچھ لوگوں نے اس پر اعتراض جتایا ضرور تھا لیکن اس معاملے میں جب پارٹی نے فیصلہ کر ہی لیا ہے تو پھر ہرکسی کواسے قبول کرناہوگا۔