ہلیال 11/ستمبر(ایس او نیوز)شہر کے سنگولّی راینّا سرکل کے قریب واقع پینے کا پانی صاف کرنے کے پلانٹ میں اچانک دھماکہ ہوا جس کی وجہ سے پانی ذخیرہ کرنے کی ٹینک، پائپ، کھڑکیوں اور دروازے کو نقصان پہنچا ہے۔

منگل کے دن دوپہر کے وقت اس پلانٹ میں اچانک دھماکہ ہوا جس کے بعد کھڑکیوں کے شیشے تقریباً 20فٹ دوری تک اچھل کر بکھر گئے۔ اتفاق سے اس وقت وہاں پر لوگوں کی چہل پہل نہیں تھی، اس وجہ سے کسی کو بھی جسمانی نقصان نہیں پہنچا۔پلانٹ کے اندر 5ہزار لیٹر پانی کی جوپلاسٹک ٹینک تھی وہ پھوٹ گئی اور تمام پانی کمرے کے ٹوٹے دروازے اور کھڑکیوں سے بہہ کر باہر نکل گیا۔ اس کے علاوہ پانی کی سربراہی کا مین پائپ بھی اکھڑگیا ہے۔

معلوم ہوا ہے کہ گزشتہ دو تین سال سے پانی کی صفائی کا پلانٹ ہلیال بلدیہ کی دیکھ ریکھ میں چل رہا ہے۔ اس ٹینک کے عطیہ او این جی س۔ ایم آر پی ایل کمپنی کے سوشیل ریسپانسبلیٹی فنڈ سے دیا گیا تھا۔اب اس پلانٹ میں دھماکہ ہونے کے بعدسمجھا جارہا ہے کہ پانی ذخیرہ کرنے کے لئے استعمال کی گئی پلاسٹک کی ٹینک کمزور ہوجانے سے پھٹ گئی ہوگی اور پانی کمرے میں جمع ہونے کے بعد کھڑکیاں اور دروازے دھماکے سے ٹوٹ گئے ہونگے۔ پھر بھی اس کے تعلق سے حقائق جاننے کے لئے ہلیال بلدیہ کی طرف سے پولیس میں شکایت درج کرنے کافیصلہ کیا گیا ہے۔

 بلدیہ کے ذرائع کے مطابق چند مہینے پہلے ڈانڈیلی میں بھی پانی کی صفائی کے پلانٹ میں استعمال کی گئی پلاسٹک ٹینک کمزور ہوکر اسی طرح پھوٹ گئی تھی۔