کاروار: بیچ سمندر میں پھنس گئے ماہی گیر؛ نیوی اور کوسٹل گارڈس کے اہلکاروں نے کی مدد؛ بحفاظت کنارے تک پہنچانے میں کامیاب
کاروار 26/اکتوبر (ایس او نیوز) سمندر کے بیچوں بیچ ماہی گیر بوٹ کے انجن میں خرابی پیدا ہونے کے بعد ماہی گیر بری طرح پھنس گئے تھے، مگر نیوی اور کوسٹ گارڈ کے اہلکار تمام ماہی گیروں کو بچاکر کنارے تک لانے میں کامیاب ہوگئے، یہ واردات سنیچر کو پڑوسی ریاست گوا کے لولم میں پیش آئی۔
ذرائع سے ملی اطلاع کے مطابق اُڈپی کی راج کرن نامی بوٹ پر آٹھ ماہی گیر سوار تھے اور گوا سمندر میں مچھلیوں کا شکار کررہے تھے، مگر بحر عرب میں آئے طوفان دوران بیچ سمندر میں ہی ان کی بوٹ خراب ہوگئی تو تمام ماہی گیروں کی جان کے لالے پڑ گئے۔
ماہی گیروں نے بوٹ میں خرابی پیدا ہونے کی اطلاع کرناٹک کوسٹل سیکوریٹی پولس کو دی اور مدد فراہم کرنے کی درخواست کی جس پر کاروائی کرتے ہوئے کرناٹکا کوسٹل سیکوریٹی پولس نے گوا کے سرکاری عہدیداران سے رابطہ کیا اور بیچ سمندر میں پھنسے ماہی گیروں کو مدد فراہم کرنے کی درخواست کی، جس پر انڈین نیوی اورانڈین کوسٹ گارڈس کے اہلکار ان کی مدد کو پہنچ گئے اور تمام آٹھ ماہی گیروں کو بچانے میں کامیاب ہوگئے۔