کاروار: جنگی بحری جہاز 'وکرم آدتیہ' میں پیش آیا آتشزدگی کا معاملہ
کاروار 9/ مئی (ایس او نیوز) انڈین نیوی کے ترجمان کی طرف سے جاری کردہ ایک بیان کے مطابق کاروار بحری اڈہ پر لنگر انداز طیارہ بردار جنگی بحری جہاز 'وکرم آدتیہ' میں آتشزدگی کا معاملہ پیش آیا ہے۔
بیان میں بحری اڈہ کے افسران کے حوالہ سے کہا گیا ہے کہ نیول افسران جس روم میں آرام کرتے ہیں وہاں سے دھواں اٹھنا شروع ہوا تو دوسرے عملہ نے اس پر فوری توجہ دی اور آگ بجھانے میں کامیاب ہوگئے۔ اس آگ کی وجہ سے جہاز کو کوئی بڑا نقصان نہیں پہنچا ہے ۔ تمام عملہ پوری طرح محفوظ ہے۔
بیان میں مزید کہا گیا ہے کہ آتشزدگی کی وجوہات ابھی معلوم نہیں ہوئیں۔ اس ضمن میں تحقیقات کا حکم دیا گیا ہے۔ جہاز پر موجود تمام افسران اور عملہ سے پوچھ تاچھ کی جارہی ہے۔
خیال رہے کہ سال 2020 میں 27اپریل کو بھی اسی مقام پر اور اسی جہاز میں آتشزدگی کا واقعہ پیش آیا تھا۔ اور آگ بجھانے کی کوشش میں ایک آفیسر ہلاک بھی ہوگیا تھا۔