اترکنڑا میں بھٹکل کو چھوڑ کر دیگر تمام تعلقوں میں 90 فیصد ویکسی نیشن : ڈپٹی کمشنر نے بھٹکل کے عوام سے کی ٹیکہ لینےکی اپیل
بھٹکل:24؍ ڈسمبر(ایس اؤ نیوز) اترکنڑا ضلع کے بھٹکل کو چھوڑ کر دیگر تمام تعلقہ جات میں 90فی صد کووڈ ٹیکہ کاری کا کام مکمل ہوچکا ہے۔ اس بات کی اطلاع ڈپٹی کمشنر ملئی مہیلن نے پریس ریلیز کے ذریعے دی ہے۔
پریس ریلیز میں کہاگیا ہےکہ قومی رہنما خطوط کے مطابق اترکنڑا ضلع میں 16جنوری 2021سے مرحلہ وار مختلف طبقات اور عمر والوں کو کورونا ٹیکہ دیا جارہاہے۔ 1078000مستفیدین میں سے اب تک 1051890(97.58فی صد) لوگوں کو کورونا کا پہلا ٹیکہ لگایا گیا ہے۔ کاروار، کمٹہ ، سداپور، سرسی ، یلاپور اور منڈگوڈ تعلقہ جات میں صد فی صد ٹیکہ کاری ہوچکی ہے۔ بھٹکل تعلقہ میں صرف 80فی صد لوگوں نے ٹیکہ لیا ہے۔ بھٹکل تعلقہ میں قریب 26000لوگوں نے کورونا کاپہلا ٹیکہ بھی نہیں لیا ہے بھٹکل میں پہلا ٹیکہ لینے والوں میں سے 864743(80.22فی صد) لوگوں نے دوسرا ٹیکہ لیا ہے۔
ضلع میں اب تک 1916633لوگوں کی ٹیکہ کاری ہوئی ہے۔ ضلع بھر میں 119628لوگوں کی دوسرا ٹیکہ لینے کی مدت ختم ہوئی ہے ان سے گذارش کی گئی ہے کہ وہ جلد سے جلد ٹیکہ لیں۔ ضلعی مرکز سے بھی انہیں ایس ایم ایس کے ذریعے وبائی مرض کورونا سے محفوظ رہنے کے لئے دوسرا ٹیکہ لیناضروری ہونےکا پیغام ارسال کیاجارہاہے۔ڈی سی نے عوام سے اپیل کی کہ کووی شیلڈ لے کر جن لوگوں کے 84دن پورے ہوگئےہیں انہیں دوسرا ٹیکہ لینےکےلئے کہاجارہاہے تاکہ کورونا سے معاشرے کی حفاظت ہوسکے۔