منگلورو: بخار، کھانسی اورسانس کی تکلیف کے لئے ڈاکٹر کی چٹھی کے بغیر دوائیاں نہیں ملیں گی۔ ڈرگ کنڑولر کا حکم
منگلورو،19؍اپریل (ایس او نیوز) سردی، کھانسی، بخار اور سانس میں تکلیف جیسی شکایات ہونے پر عام طور پر لوگ سیدھے میڈیکل اسٹور میں جاکر کوئی گولی یا کھانسی کی شربت لیتے ہیں۔ لیکن اب منگلورو ڈیویزن کے ڈرگ کنٹرولر نے اس کے خلاف سخت حکم جاری کیا ہے۔
کورونا وائرس کی وباء پر قابو پانے کے لئے کیے جانے والے اقدام کے طور پردوا فروشوں کو یہ حکم جاری کیا گیا ہے جس میں کہا گیا ہے کہ کسی بھی شخص کو بخار کرنے والی گولی پیراسیٹامول یا پھرکھانسی بخار اور سانس کی تکلیف کم کرنے والی دوائی اُسی وقت دی جائے جب کہ اس کے پاس کسی رجسٹرڈ میڈیکل پریکٹیشنر کی طرف سے تجویز کردہ نسخہ (چٹھی) موجود ہو۔ اگر ڈاکٹر کی چٹھی کے بغیر کوئی شخص دوائی لینے پہنچتا ہے تو اس کی اطلاع محکمہ صحت عامہ کے افسران کو فوری طور پر دی جانی چاہیے۔
اگر ڈاکٹر کی طرف سے تجویز کردہ نسخہ لے کر کوئی شخص دوائی خریدنے کے لئے آتا ہے تو پھر اُس شخص کانام، موبائل نمبر، گھر کا پتہ اور اس کے علاوہ چٹھی لکھنے والے ڈاکٹرکا نام اور گھر کا پتہ لازمی طور پر دوائی کے بل پر درج کرنا ہوگا۔ اس حکم پر عمل نہ کرنے والے دوافروشوں (میڈیکل اسٹورس) کے خلاف ڈرگس اینڈ کاسمیٹکس ایکٹ 1940کے تحت قانونی کارروائی کی جائے گی۔