منگلورو:ڈاکٹرمریم انجم بن گئیں خواتین سے متعلقہ کینسرکے علاج میں ایم سی ایچ ڈگری پانے والی جنوبی کینرا کی پہلی ماہر ڈاکٹر
منگلورو17/اگست (ایس او نیوز) ڈاکٹر مریم انجم نے خواتین سے متعلقہ کینسر کے شعبے میں خصوصی مہارت والی ایم سی ایچ کی ڈگری حاصل کی ہے۔ جس کے ساتھ انہیں جنوبی کینرا میں اس طرح کی مہارت پانے والی پہلی ڈاکٹر ہونے کا اعزاز ملا ہے۔
ڈاکٹر مریم انجم سابق وزیر جناب یو ٹی قاد ر کے بھائی ڈاکٹر یو ٹی افتخار کی اہلیہ ہیں۔ ڈاکٹر مریم نے خواتین کے بعض اہم اعضاء میں ہونے والے مختلف کینسرس کی سرجری کے لئے یہ خصوصی ڈگری امریتا انسٹی ٹیوٹ آف میڈیکل سائنسس کوچی سے حاصل کی ہے۔
ڈاکٹر مریم انجم کے بارے میں معلوم ہوا ہے کہ وہ اسکولی زمانے سے ہی بہت ذہین طالبہ رہی ہیں اور ہمیشہ انہوں نے صلاحیتوں (میرٹ) کی بنیاد پر اعلیٰ تعلیم کے لئے داخلہ پایاہے۔منگلورو کے فادرمولر س میڈیکل کالج سے ایم بی بی ایس کرنے کے بعد خواتین کے علاج (گائناکولوجی اینڈ آبسٹیٹرکس) میں اینا پویا میڈیکل کالج سے سرجری کی ڈگری ایم ایس مکمل کی۔ پھرقدوائی انسٹی ٹیوٹ آف آنکولوجی (کینسر) بنگلوروسے فیلو شپ کیا۔انہوں نے کینسر کے علاج میں دواؤں سے علاج (کیموتھیراپی) میں بھی خصوصی تربیت پائی ہے۔وہ روبوٹ کے ذریعے سرجری کرنے میں بڑی مہارت رکھتی ہیں۔
ڈاکٹر مریم انجم کے تحقیقی مقالے نیشنل اور انٹرنیشنل رسالوں میں شائع ہوتے ہیں۔ انہوں نے جب جنوبی کوریا میں منعقدہ میڈیکل سمپوزیم میں اپنا تحقیقی مقالہ پیش کیاتھا تو انہیں برازیل میں منعقد ہونے والی انٹرنیشنل میڈیکل کانفرنس میں شرکت کی دعوت اور اسکالر شپ کی پیش کش کی گئی تھی۔ڈاکٹر مریم کے بارے میں معلوم ہوا ہے کہ راجیو گاندھی یونیورسٹی آف میڈیکل سائنس کی سنڈیکیٹ ممبر بھی ہیں۔