فریدآباد 15/ڈسمبر(ایس او نیوز/ایجنسی): ہریانہ کے شہر فریدآباد کی بابا منڈی کے چاچا چوک میں نامعلوم افراد کے ایک گروپ نے گو رکھشک بٹو بجرنگی کے بھائی مہیش پنچال پرپٹرول ڈال کر مبینہ طورپر آگ لگادی۔

پولیس کا کہنا ہے کہ پنچال 54 فیصد جھلس گیا ہے اور ایک خانگی دواخانہ میں اس کا علاج جاری ہے۔ پنچال نے ایک مشتبہ کی شناخت ارمان کے طورپر کی ہے جس کی جوس کی دکان ہے۔ پنچال نے پولیس کو بتایا کہ وہ چہارشنبہ کی رات بابا منڈی میں موجود تھا۔ ایک کار سے 5-6 لوگ اترے اور اسے مارنے پیٹنے لگے۔ جس کے دوران کسی نے اس پر پٹرول پھینک دیا اور آگ لگادی۔ میں نے خود کو بچانے کے لئے نالے میں چھلانگ لگائی اورگھر چلاگیا جہاں سے میرا بھائی راج کمار عرف بٹو بجرنگی نے مجھے سرکاری اسپتال میں داخل کرایا۔

بتاتے چلیں کہ بٹو بجرنگی کو نوح تشدد کے دوران اشتعال انگیز تقریر کرنے پر گرفتار کیا گیا تھا لیکن اسے بعد میں ضمانت مل گئی تھی۔ فریدآباد پولیس کے ترجمان صوبے سنگھ نے بتایا کہ کرائم برانچ اور پولیس ٹیمیں معاملہ کی تحقیقات کررہی ہیں۔