کاروار،30؍مئی (ایس او نیوز)ضلع شمالی کینرا میں کووِڈ وبا ء پر قابو پانے کے مرحلے پر اچانک بیرون ضلع سے آنے والے افراد کی وجہ سے کورونا سے متاثرہ مریضوں کی تعدا د میں روزبروز اضافہ ہوتا جارہا ہے۔

کووڈ پروٹوکول کے مطابق ریاست کے اندر،  باہر سے آنے والے ہر شخص کے لئے لازم ہے کہ وہ سیوا سندھو نامی ایپ پر اجازت حاصل کرے،  اس طرح یہاں اجازت لے کر ضلع کے اندر آنے والے 2752افراد میں سے پہلے مرحلے میں 2493افراد کے گلے سے تھوک کے نمونے جانچ کے لئے روانہ کردئے گئے تھے۔ منگلورو کی لیباریٹری میں جانچ کے بعد ان میں سے 1565لوگوں کی رپورٹ نگیٹیو آئی ہے۔ 35افراد میں کووِڈ کا مرض ہونے کی بات ثابت ہوئی ہے۔  893لوگوں کی رپورٹ کا انتظارکیا جارہاہے۔ جو 259افراد باقی تھے ان کے گلے کے نمونے بھی جانچ کے لئے بھیج دئے گئے ہیں اس طرح جملہ 1152 لوگوں کی جانچ رپورٹ کا انتظار کیا جارہا ہے۔واضح رہے کہ بیرون ریاست سے جتنے لوگ ضلع میں داخل ہوئے ہیں ا ن میں سے زیادہ تر افراد گجرات اور مہاراشٹراسے لوٹنے والے شامل ہیں۔ 

اس دوران ضلع پنچایت سی ای او محمد روشن نے بتایا کہ اب تک ضلع کے مشتبہ اور متاثرہ افراد کے نمونے جانچ کے لئے ضلع سے باہر دوسری لیباریٹریز میں بھیجے جاتے تھے اب کاروار میڈیکل کالج اسپتال میں ہی پوری طرح جدید سہولتوں والی لیباریٹری میں جانچ کا کام شروع ہوگیا ہے اور آئندہ ضلع کے تمام سیمپل اسی لیباریٹری میں جانچ کے لئے بھیجے جائیں گے جس کی وجہ سے نتائج جاننے کے لئے زیادہ دیر انتظار کرنے کی ضرورت پیش نہیں آئے گی۔