سرسی :16؍مارچ (ایس او نیوز) اترکینرا پارلیمانی حلقہ سے کانگریس امیدوار نہ  ہونے پرسرسی، سداپور،بنواسی سمیت ضلع کے مختلف مقامات سے پارٹی لیڈران اور  کارکنان نے عدم اطمینان کا اظہار کرتے ہوئے جمعہ کو ڈی سی سی دفتر کے سامنے  ٹائر جلا کر احتجاج کیا اور ڈی سی سی  صدر بھیمنا نائک کا گھیراؤ کیا  ۔

سرسی کے سابق بلاک کانگریس صدر رمیش دباشی نے احتجاج سے قبل لیڈران اور جمع ہوئے سینکڑوں کارکنان سے خطاب کرتے ہوئے کہاکہ اپنے وجود اورتشخص کوباقی رکھنے کے لئے احتجاج ضروری ہے اس کے بعد دفتر کے سامنے ٹائروں کو جلاتے ہوئے ہمیں ٹکٹ چاہئے کے نعرے لگائے گئے اور دو کرسیوں کو بھی آگ لگائی گئی ۔ اس  دوران میں جب ڈی سی سی صدر بھیمنانائک دفتر پہنچے تو ان کی کار وہیں روک کر گھیراؤ کرتے ہوئے کہاگیا کہ ہمارے ضلع کے ساتھ ناانصافی کی گئی ہے، ہائی کمان کو متوجہ کرنے کے لئے گھیراؤ کررہے ہیں، آپ کی ذمہ داری ہے کہ ضلع کانگریس کارکنان کے جذبات کو اعلیٰ کمان تک پہنچائیں۔ اس موقع پر ضلع اقلیتی صدر عبدالمجید، لیڈران ستیش نائک، سوما اگران کر، تعلقہ پنچایت صدر شری لتا، سرسی بی سی سی صدر جگدیش گوڈا، بنواسی صدر دیامنا، بسوراج، رتنا شٹی ، بھئیرو نائک، کے ایل نائک، شریکانت تاریباگلو، جیوتی گوڈا، ناصر خان، عبدالقادر ، ذبیح اللہ وغیرہ موجود تھے۔

بھیمنانائک کا جواب : لیڈران  اور  کارکنان کے جذبات کی قدر کرتےہوئے ڈی سی سی صدر بھیمنانائک نے خطاب کرتے ہوئے کہاکہ ضلع کے تمام بلاک کانگریس کی طرف سے احتجاج اور گھیراؤ کیاگیا ہے، اس کی پوری تفصیلات ہائی کمان تک پہنچائی جائیں گی، ہم نے ریاستی لیڈران کو اس طرف متوجہ کیا ہے،اننت کمار ہیگڈے کی  25برسوں کی ترقی کیا کچھ ہے عوام کو اچھی طرح معلوم ہے، عوام کو مشتعل کرنے والی باتیں بھی سب کو پتہ  ہیں، عوام تبدیلی چاہتے ہیں، کانگریس پوری طرح تیار ہے ، یہ جو کچھ ہواہے ہائی کمان کا فیصلہ ہے، اس میں وزیر کا کوئی ہاتھ نہیں ہے، تبدیلی کی کوشش جاری ہے، ہائی کمان کی طرف سے جو بھی حتمی فیصلہ ہوگا اس پر تمام راضی رہنےکی بات کہی ۔