انکولہ میں کار اور لاری کے درمیان تصادم :2 ہلاک، چار زخمی
انکولہ :13؍ اپریل(ایس اؤ نیوز) قومی شاہراہ 63پر ہیبولی کےقریب کاراور لاری کے درمیان ہوئے تصادم میں کار میں سوار دو لوگ ہلاک ہوگئے جبکہ دیگر چار شدید زخمی ہو گئے۔ حادثہ منگل صبح پیش آیا۔
مہلوکین کی شناخت انکولہ کے آورسا کےمکین گروپروساد انویکر (32) اور ان کے آپا کی بیٹی سنجنا سنتوش رائیکر (7) کی حیثیت سےکی گئی ہے۔ سنتوش رائیکر کی بیوی اشوینی رائیکر ، بیٹا سوہم رائیکر اور پریتم ریونکر حادثے میں شدید زخمی ہوئے ہیں اور انہیں قریبی اسپتال میں داخل کیا گیا ہے۔
ذرائع نے خبر دی ہےکہ گروپرساد مہاراشٹرا کے پونا میں مقیم اپنی آپا کے خاندان کو ہندوؤں کے نئے سال یوگادی کی مناسبت سے کار کے ذریعے اپنے گاؤں آورسا لے کر آرہا تھا۔ جب کہ پریتم ریونکرنامی دوست ان کے ساتھ تھا۔ مہاراشٹرا کی لاری انکولہ سے یلاپور کی طرف جارہی تھی کہ ہیبولی ہائی وے پر لاری نے کار کو تیزی کے ساتھ ٹکر ماردیا۔
حادثے میں کار چکنا چور ہوگئی ہے۔ تہوار کی خوشی میں مصروف خاندان میں اچانک ہوئی اموات سے غم کا سایہ چھا گیاہے۔
حادثے کی اطلاع پاتے ہی پولس کی پٹرولنگ سواری جائے وقوع پر پہنچی۔ سی پی آئی کرشنا نند نایک اور پی ایس آئی سنپت بھی جائے وقوع پر پہنشچ کر زخمیوں کو اسپتال لے جانے میں تعاون کیا۔ انکولہ پولس تھانےمیں کیس درج ہواہے۔