بھٹکل کا لڑکا 21 فروری کو دبئی کے قریب فُجیرہ میں منعقدہ ورلڈ کراٹے یوتھ لیگ میں کرے گا انڈیا کی نمائندگی
بھٹکل8 فروری (ایس او نیوز) بھٹکل کا بارہ سالہ لڑکا فلاح ابن فیاض احمد ایم جے متحدہ عرب امارات کےمعروف شہر دبئی کے قریب فُجیرہ میں منعقدہ ورلڈ کراٹے یوتھ لیگ میں انڈر 14 زُمرے میں ٹیم انڈیا کی نمائندگی کرے گا جو اسی ماہ یعنی 21 سے 25 فروری کو منعقد ہورہا ہے۔ اس بات کی اطلاع امرشا کراٹے اینڈ فٹنس اکیڈمی کے مینجنگ ڈائرکٹر اور ورلڈ کراٹے فیڈریشن (WKF) سرٹیفائڈ کوچ محمد امر شاہ بندری نے دی ہے۔
امرشا اکیڈمی سے تربیت پانے والا فلاح اس سے قبل بنگلور میں منعقدہ اسٹیٹ لیول کراٹے ٹورنامنٹ میں انڈر 14 کے زمرے میں اول مقام حاصل کرکے نیشنل لیول کے لئے منتخب ہوا تھا، پھر دہلی میں منعقدہ مقابلے میں بھی اول مقام حاصل کرتے ہوئے عالمی مقابلے کے لئے منتخب ہوا تھا۔ بی بی پرائمری اسکول میں ساتویں درجہ میں زیرتعلیم فلاح اب انڈر 14 زُمرے میں فُجیرہ میں منعقد ہونے والے ورلڈ کراٹے یوتھ لیگ میں انڈین کراٹے ٹیم کی نمائندگی کرے گا۔
بتایا گیا ہے کہ فُجیرہ میں منعقدہ اس کراٹے یوتھ لیگ مقابلے میں دنیا کے تقریبا تمام ممالک سے اتھلیٹس حصہ لے رہے ہیں اور انڈر 14، انڈر 17 اور انڈر 21 زُمرے سے جملہ دوہزار سے بھی زائد اتھلیٹس اپنی اپنی صلاحیتوں کا مظاہرہ کریں گے۔
پتہ چلا ہے کہ فُجیرہ میں منعقد ہونے والے اس کراٹے ٹورنامنٹ میں حصہ لینے کے لئے فلاح ایم جے 20 فروری کو اپنے کوچر کے ساتھ دبئی کے لئے روانہ ہورہا ہے، اس کے والد جو کویت میں برسرروزگار ہیں، وہ بھی اپنے فرزند کی ہمت افزائی کرنے 20 فروری کو دبئی پہنچ رہے ہیں۔
عالمی مقابلے میں حصہ لینے والے فلاح کے لئے بھٹکل کے مختلف اداروں کے ذمہ داران کی طرف سے نیک خواہشات کا اظہار کیا گیا ہے۔