بھٹکل 13/ اپریل (ایس او نیوز) تعلقہ کے مدینہ کالونی کے قریب نیشنل ہائی وے پر متنازعہ مُرین کٹے معاملے میں پولس نے تین لوگوں کو اپنی تحویل میں لیا ہے جن پر الزام ہے کہ انہوں نے پولس اہلکاروں کو اپنی ذمہ داری ادا کرنے سے روکنے کی کوشش کی۔
تحویل میں لئے گئے ملزمین کی شناخت ہورلی سال کے رہنے والے لکشمن ناگپّا نائک (۳۲)، ناگراج کنیّا نائک(۲۹) اور کارگیدے کے رہنے والے روی چندرو نائک کی حیثیت سے کی گئی ہے۔
پتہ چلا ہے کہ گذشتہ روز انہوں نے رات قریب 11:30 بجے متنازعہ مُرین کٹے والی جگہ پر پہنچ کر مشکوک سرگرمیاں انجام دینے کی کوشش کی، موقع پر موجود پولس اہلکاروں نے انہیں روکتے ہوئے اُن سے سوال کرنے کی کوشش کی کہ وہ یہاں کیوں آئے ہیں اور کیا کرنا چاہتے ہیں تو انہوں نے جواب دینے کے بجائے اُلٹا پولس کے ساتھ ہی اُلجھنے لگے اور پولس سے سوال کرنے لگے کہ ہم کو روکنے والے اور ہم سے سوال پوچھنے والے آپ کون ہیں، ذرائع نے خبردی ہے کہ ان لوگوں نے سیدھے پولس کے ساتھ ہاتھاپائی کرنے کی بھی کوشش کی۔
پولس نے تینوں لوگوں کو اپنی تحویل میں لیا ہے اور سرکل پولس انسپکٹر دیواکر کی قیادت میں جانچ جاری ہے۔