بھٹکل سرکل کے قریب المناک سڑک حادثہ؛ لاری نے اسکوٹر سوار کو کچل دیا؛ موقع پر موت
بھٹکل 21/ فروری (ایس او نیوز) یہاں شمس الدین سرکل کے قریب پیش آئے ایک المناک سڑک حادثہ میں ایک عمر رسیدہ شخص کی موقع پر ہی موت واقع ہوگئی، جن کی شناخت ابراہیم شیخ (75) کی حیثیت سے کی گئی ہے۔
بتایا گیا ہے کہ جناب ابراہیم شیخ مدینہ کالونی میں واقع اپنے مکان سے اپنی اسکوٹی پر سوار اسٹیٹ بینک جارہے تھے، شمس الدین سرکل کے قریب پیچھے سے ایک لاری نے اُن کی اسکوٹی کو ٹکر ماردیا۔ سمجھا جارہا ہے کہ ٹکر لگتے ہی اسکوٹر پر سوارابراہیم شیخ نیچے گرے اور لاری کا پچھلا پہیہ اُن کے سر پر سے گذرگیا، اور پل بھر میں اُن کی موت واقع ہوگئی۔ انا للہ و اناالیہ راجعون۔
پولس ذرائع نے بتایا کہ حادثے کے فوری بعد لاری ڈرائیور ڈر کے مارے موقع پر سے فرار ہوگیا، جس کی تلاش جاری ہے۔لاری خالی تھی اور کنداپور کی طرف جارہی تھی، جس کے دوران یہ حادثہ پیش آیا۔
لاری کی اسکوٹی سے ٹکر لگتے ہی سینکڑوں لوگ موقع واردات پر جمع ہوگئے، خبر ملتے ہی بھٹکل ٹائون پی ایس آئی کُڈ گنٹی بھی جائے واردات پر پہنچ کر جائزہ لیتے ہوئے حادثے کے تعلق سے معلومات جمع کی اور لاش کو فوری طور پر پوسٹ مارٹم کے لئے سرکاری اسپتال منتقل کیا۔
جناب ابراہیم شیخ کے تعلق سے بتایا گیا ہے کہ ان کا تعلق کاروار سے ہے، مگر وہ گذشتہ 40 سالوں سے بھٹکل میں ہی مقیم تھے، وہ بھٹکل پی ڈبلیو ڈی آفس میں 25 سالوں تک کلرک کے طور پر خدمات انجام دی، قریب 15 سال قبل وہ اپنی ڈیوٹی سے وظیفہ یاب ہوئے تھے۔ اُن کے پسماندگان میں بیوہ، دو لڑکے اور ایک دُختر ہے۔
ان کے مامو جناب نذیر شیخ نے بتایا کہ ان کا ایک بیٹا سعودی عربیہ اور دوسرا قطر میں مقیم ہیں، والد کے انتقال کی خبر ملتے ہی قطر سے ان کا بیٹا بھٹکل کے لئے نکل چکا ہے۔