بھٹکل کورونا وائرس معاملہ؛ انتظامیہ نے جاری کیا وبائی مرض اور ہنگامی حالات سے نمٹنے کے لئے سرکاری فنڈ؛ فاقہ کشی پر مجبور افراد کے لئے بھی کھانے کا انتظام
بھٹکل 28/مارچ (ایس او نیوز)ضلع شمالی کینرا کے ڈپٹی کمشنر نے ایک بیان جاری کرتے ہوئے کہا ہے کہ اس قدرتی آفت سے پیدا شدہ صورتحال سے نپٹنے کے لئے ضلع انتظامیہ نے سرکاری فنڈ جاری کردیا ہے۔
بیان میں کہا گیا ہے کہ ضلع سپرنٹنڈنٹ آف پولیس لاء اینڈ آر ڈر کی نگرانی کریں گے جبکہ ضلع پنچایت سی ای او روشن تمام طبی سہولتوں کی نگرانی کریں گے۔ اخباری بیان کے مطابق ضلع انتظامیہ نے بھٹکل میں ہیلتھ ایمرجنسی کی صورت حال میں درکار اقدامات کرنے کے لئے بھٹکل اسسٹنٹ کمشنر کو ایک کروڑ روپے جاری کردئے ہیں۔ضلع پنچایت چیف ایکزیکٹیو آفیسر روشن کے لئے 2کروڑ روپے جاری کیے گئے ہیں۔تمام تحصیلداروں کو ہدایت جاری کی گئی ہے کہ قدرتی آفات میں راحت رسانی کے لئے جو فنڈ ان کے کھاتے میں جمع کیا گیا تھا اسے بھی خرچ کریں، اور اس میں ہرگز تاخیر نہ کریں۔
ڈی سی نے عوام کو یقین دلایا ہے کہ ضلع انتظامیہ کے پاس افردی وسائل (ہیومن ریسورسز) اور پیسے کی کوئی کمی نہیں ہے اور وہ حالات سے نپٹنے کے لئے تمام اقدامات کررہی ہے۔
فاقہ کشی پر مجبور افراد کے لئے کھا نا فراہم کرنے کا انتظام: ضلع شمالی کینرا کے ڈپٹی کمشنر ڈاکٹر ہریش کمارنے اعلان کیا ہے کہ لاک ڈاؤن کی وجہ سے جوغریب لوگ خاص کر مزدور یا بے گھر افراد فاقہ کشی پر مجبور ہوگئے ہیں، ان کے لئے ضلع انتظامیہ کی طرف سے فوری طور پر آنگن واڈی اسکولوں میں پکا ہوا کھا نا فراہم کیا جائے گا۔
اس سے استفادہ کرنے کے لئے ضروری شرط یہ ہے کہ راجیندرا بیکل ڈپٹی ڈائریکٹر سے 9880301250پر رابطہ قائم کر کے ضرورتمندوں کو اپنا نام رجسٹر کرنا ہوگا۔ اس کے تھوڑی دیر بعد انہیں قریبی آنگن واڈی اسکول کے تعلق سے معلومات فراہم کی جائے گی، جہاں سے وہ کھانا حاصل کرسکتے ہیں۔ کھانا لے جانے کے لئے لوگوں کو اپنا ڈبہ خود ساتھ میں لانا ہوگا۔
اخباری بیان میں واضح کیا گیا ہے کہ اس اسکیم پر عمل درآمد میں ابتدائی طور پر کچھ الجھن اور پیچیدگی پیدا ہوسکتی ہے۔لیکن عوا م کو برداشت کرتے ہوئے ضلع انتظامیہ کے ساتھ تعاون کرنا ہوگا۔
ایک اور پریس ریلیز میں کہا گیا ہے کہ جوبے گھر ہیں اور فاقہ کشی کا شکار ہورہے ہیں ان کے لئے سوشیل ویلفیئر اور بی سی ایم ہاسٹلس میں قیام وطعام کا انتظام کیا گیا ہے۔ ایسے لوگوں کو مندرجہ ذیل افسران سے رابطہ قائم کرنا چاہیے:
۱۔ پرشوتم ڈسٹرکٹ ویلفیئر آفیسر (ڈی ایس او) 9483886886
۲۔ بڈیگار (بی سی ایم) 9448508383
اگر عوام کو ایسے لوگوں کے بارے میں کوئی جانکاری ہے تو مندرجہ بالا نمبروں پر اس کی اطلاع دیں۔
