بھٹکل میں لاک ڈاون میں چھوٹ مگر کنٹیمنٹ زون میں آنے کی وجہ سے عدالت میں صرف ای فائلنگ کی سہولت
بھٹکل یکم جون (ایس او نیوز) گذشتہ ماہ ایک ساتھ بھٹکل میں کورونا کے 30 معاملات سامنے آنے کے بعد بھٹکل کو کنٹیمنٹ زون کے زمرے میں رکھا گیا تھا، مگر اب بھٹکل میں لاک ڈاون میں چھوٹ دی گئی ہے اور دکانوں اور دیگر کاروباری اداروں کو صبح آٹھ بجے سے دوپہر دو بجے تک کھولنے کی اجازت دی گئی ہے، جس کے ساتھ ہی پورے شہر میں عوامی چہل پہل دیکھی جارہی ہے مگر بھٹکل عدالت میں کام بحال نہیں ہوا ہے۔
خیال رہے کہ بھٹکل میں اب صرف پانچ مخصوص محلوں کوہی کنٹینمنٹ زون میں رکھا گیاہے اور دیگر تمام علاقوں میں چھوٹ دی گئی ہے مگر بتایا گیا ہے کہ بھٹکل عدالت بھی کنٹیمنٹ زون کے علاقہ میں واقع ہونے کی وجہ سے عدالت میں صرف ای فائلنگ اور وڈیو کانفرنسنگ کے ذریعے ہی عدالتی کاروائیاں انجام دی جارہی ہیں۔
عدالت کنٹیمنٹ زون میں آنے کی وجہ سے عدالت کی داخلی گیٹ کو بند کردیا گیا ہے اور پتھر وغیرہ رکھ کر کسی کو اندر جانے پر پابندی عائد کی گئی ہے۔ بتایاگیا ہے کہ عدالت کے احاطے میں وکیلوں کو بھی جانے کی اجازت نہیں ہے ۔
اطلاع کے مطابق ریاستی ہائی کورٹ اور ملک کی سب سے بڑی عدالت سپریم کورٹ کی طرف سے دی گئی ہدایت پر عمل کرتے ہوئے اب بھٹکل عدالت میں صرف وڈیو کانفرنس کے ذریعے عدالتی کاروائی انجام دی جاسکتی ہے۔ اس بات کی بھی اطلاع ملی ہے کہ عدالت کے اندر کام کرنے والے اسٹاف کو بھی اندر جانے سے پہلے تھرمل اسکیننگ کی جاتی ہے۔
